سەرکۆنسوولی کۆماری ئیسلامیی ئیران لە سلێمانی دەڵێت سەرۆککۆماری ئێران بەیانیی ڕۆژی پێنجشەممە 12ی ئەیلوول دەگاتە هەولێر و لەگەڵ بەرپرسانی باڵای حکوومەتی هەرێمی کوردستان کۆ دەبێتەوە.
محەمەد مەحموودیان سەرکۆنسۆلی ئێران لە سلێمانی گوتی: پەیوەندییەکانی نێوان ئێران و هەرێمی کوردستان باشن و پلانیان ئەوەیە ئەم پەیوەندییانە باشتر بکەن.
مەحموودیان دەڵێت: “سەرەڕای دیدار و کۆبوونەوە زۆرەکانی بەغدا، بە خۆشییەوە بەڕێز سەرۆککۆماری ئێران سەردانی هەرێمی کوردستانیش دەکات و لەگەڵ بەرپرسانی باڵای هەرێم لە هەولێر و سلێمانی دیدار و کۆبوونەوەی دەبێت. بە پێی ئەو پلانەی دانراوە، سەرۆککۆماری ئێران و شاندی هاوڕێی، بەیانیی ڕۆژی پێنجشەممە 12ی ئەیلوولی 2024 سەردانی هەولێر دەکەن و پاش نیوەڕۆی ئەو ڕۆژەش دەچنە سلێمانی و لەگەڵ بەرپرسانی ئەوێ کۆ دەبنەوە.”
ئەو دەڵێت: “سەردانی سەرۆککۆماری ئیران بۆ هەرێمی کوردستان هەڵگری پەیامێکی گرینگ بۆ هەموو لایەنەکانە. پەیوەندییەکانی نێوان ئێران و هەرێمی کوردستان، ڕەگ و ڕیشەی قووڵی مێژوویی و شارستانی و کەلتووریی هەیە. دڵنیاین هەوراز و نشێوی کاتی لەم پەیوەندییانەدا، خەوش ناخاتە سەر پەیوەندییەکانمان.”
مەحموودیان هەروەها گوتی: “وەک ئەمڕۆ سەرۆککۆماری ئێران بە ژمارەیەک لە میدیای هەرێمی کوردستانی ڕاگەیاند، پەیوەندییەکانی نێوان ئێران و هەرێمی کوردستان باشە و ئێمە بەدوای باشتر کردنی ئەم پەیوەندییانەوەین”.
