ئەندامێكی خولی پێشوی پەرلەمان دەلێت بەپێی دەستوور، ژیان و بژێویی خەڵکی کوردستان لە ئەستۆی حکومەتی عێراقە. لەکاتێکدا هەرێم سەرجەم داهاتەکانی ڕادەستی بەغدای کردووە، ئیدی نەناردنی مافی شایستەی خەڵکی کوردستان چ بیانوویەک هەڵدەگرێت؟
سەروان هەركی ئەندامی خولی پێشوی پەرلەمان بە ئاژانسی هەوالی زاگرۆسی راگەیاند ئەگەر هۆکار حکومەتی هەرێمە، بۆچی بەغدا ڕونکردنەوەی دروست نادات کە هۆکاری دواکەوتنی مووچە هەرێمە نەک بەغدا؟ فیدڕاڵییەت و دەستوور لە کوێن کاتێک ژیانی ملیۆنان هاووڵاتی یاریی پێ دەکرێت بەبێ هۆکارێکی بڕواپێکراو…!
سەروان هەركی گوتیشی نوێنەرانی کورد لە بەغدا، ناکرێت چیتر ڕێگە بدەن ژیانی خەڵکەکەیان بەم شێوەیە بەردەوام بێت و ڕۆژبەڕۆژ لە پێگە و سەنگی قەوارەی هەرێمی کوردستان و حکومەتەکەی بدرێت. ئەگەر پێیان وایە ناتوانن هیچ بکەن، با بکشێنەوە.
سەروان هەركی باسی لەوەش كرد بەردەوام بوون بەم شێوەیەی ئێستا لە بەغدا، شەرمەزارییەکی گەورەیە بەرامبەر خەڵک و قەوارەی هەرێمی کوردستان. چونکە ئەوەی ئێستا لە بەغدا دەگوزەرێت، تەنها لێدانە لە پێگە و قەوارەی کوردی و یاریکردن بە ژیانی ملیۆنان خەڵکی کوردستان.
گۆران هەركی