یەکشەممە، وەزیری گواستنەوەی لوبنان داوای لە عێراق کرد، گەشتەکانی لەگەڵ لوبنان دەست پێ بکاتەوە، ئەمەش دوای ئەوەی عێراق بەهۆی ڕووداوەکانی سووریا گەشتەکانی ڕاگرت.
عەلی حەمییە، وەزیری گواستنەوەی لوبنان گوتی، “فڕۆکەکانی سەر بە کۆمپانیای هێڵی ئاسمانی ڕۆژهەڵاتی ناوەڕاست بە شێوەیەکی بەردەوام ئاسمانی سووریایان بەزاند بۆ فڕۆکەخانە جیاوازەکانی عێراق و وڵاتانی دیکەی عەرەبی، ئەمەش دوای هەماهەنگی لەگەڵ ڕێکخراوی فڕۆکەوانی مەدەنی نێودەوڵەتی و فڕۆکەخانەی دیمەشق بووە”.
عەلی حەمییە لە بەیاننامەیەکدا داوای لە هێڵی ئاسمانی عێراقی کرد، “گەشتەکانی لە عێراقەوە بۆ لوبنان دەست پێ بکاتەوە و بە پێچەوانەشەوە، بەو پێیەی لە 27-11-2024ەوە ڕەزامەندی لەسەر دراوە بۆ دەستپێکردنەوەی گەشتەکانی”.
عێراق لەسەرەتای مانگی کانوونی یەکەمی ئەمساڵەوە دەست پێ کردنەوەی گەشتەکانی لەگەڵ لوبنان ڕاگەیاندبوو، دوای ئەوەی لە ئەنجامی ڕووداوەکانی لوبنان بۆ ماوەی زیاتر لە دوو مانگ گەشتەکانی ڕاگرتبوو.