گوتەبێژی پێشووی هێزەكانی سووریای دیموكرات (هەسەدە) جەخت لە گرنگیی پێگەی سەرۆك بارزانی بۆ ناوبژیوانیكردنی هێزەكانی رۆژئاوای كوردستان دەكاتەوە و باس لە چەند مەرجێك دەكات كە بۆ هەسەدە داندراون.
كۆتایی هەفتەی رابردوو، پاش دەستپێشخەرییەكی سەرۆك بارزانی و ناردنی نوێنەری خۆی بۆ رۆژئاوای كوردستان، مەزڵووم عەبدی، فەرماندەی هەسەدە سەردانی هەولێری كرد و لەگەڵ سەرۆك بارزانی كۆبووەوە.
لەمبارەیەوە عەقید تەڵاڵ عەلی سلۆ، گوتەبێژی پێشووی هەسەدە بە ڕۆژنامەی (القدس العربي) راگەیاندووە، بە نێوانگیریی سەرۆك بارزانی، ڕێككەوتنێكی سەرەتایی كراوە و چەند مەرجێك داندراوە كە دەبێ هەسەدە پێیانەوە پابەند بێت، پاشان ڕێككەوتنی كۆتایی دەكرێت بە شێوەیەك كە هەموو پێكهاتەكانی سووریا پێی رازی ببن.
گوتیشی: ”بارزانی ناوبژیوانێكی نموونەییە و پاش ئەوەی ژمارەیەك مەرج وەدیهێندران، هەسەدە و ئەنجوومەنی سووریای دیموكرات دەچنە چوارچێوەی دەوڵەتی سووریاوە.“
ئەوەشی ئاشكرا كرد كە كۆبوونەوەكەی سەرۆك بارزانی و مەزڵووم عەبدی سێ دۆسیەی لە خۆوە گرتووە، لە هەموویان گرنگتر بابەتی یەكڕیزیی كورد بووە لە گۆڕەپانی سووریا، هەروەها باس لەوە كراوە كە ئەو چەكدارانەی پارتی كرێكارانی كوردستان (پەكەكە) و فەرماندانەی هەسەدە كە خەڵكی سووریا نین، لە رۆژئاوای كوردستان دەربچن. لەگەڵ باسكردن لە چارەنووسی هێزی پێشمەرگەی ڕۆژ كە ژمارەیان چەند هەزار پێشمەرگەیەكە و كوردی ڕۆژئاوای كوردستانن.
گوتەبێژی پێشووی هەسەدە ئەوەی دووپات كردۆتەوە كە لە كۆبوونەوەكەدا جەخت لە یەكخستنی هەڵوێستی كورد بۆ گفتوگۆكردن لەگەڵ ئیدارەی نوێی سووریا و پاراستنی مافی كورد لە سووریا و بەدیهێنانی مافەكانی گەلی كوردستان لە ڕێگەی ئاشتی لە سووریا كراوەتەوە.