عەباس عێراقچی، وەزیری دەرەوەی کۆماری ئیسلامیی سەبارەت بە هەندێک گومانەی میدیایی دەربارەی ئاڵوگۆڕی پەیام لە نێوان ئێران و ئەمەریکادا جەختی کردەوە: “هیچ پەیامێکی دیاریکراو لە نێوان ئێران و ئەمەریکادا ئاڵوگۆڕ نەکراوە”.
عەباس عێراقچی ڕۆژی چوارشەممە ٢٩ی کانوونی دووەم، لە پەراوێزی کۆبوونەوەی ئەنجومەنی وەزیران لە بەردەم ڕۆژنامەنووسان وەڵامی بە دەنگۆی سەبارەت بە وتووێژ و ڕێککەوتن لەگەڵ ئەمەریکا دایەوە. عێراقچی، بە ئاماژە بە وتووێژی دوایی خۆی لەگەڵ کەناڵی سکای نیوزی بەریتانیا گوتی: هەڵوێستەکانی ئێران بە تەواوی ڕوونن.
وەزیری دەرەوەی ئێران گوتی: وتووێژەکانی ئێران لەگەڵ وڵاتانی ئەوروپایی بەردەوامن و تاران چاوەڕێی “ڕوونکردنەوەی سیاسەتەکانی لایەنی بەرانبەر”ە. ئەو جەختی کردەوە “لە ئێستادا هیچ بڕیارێک بۆ وتووێژ نییە و پێوەری ئێران هەمان بێمتمانەیی پێشووە و کێشەکان بە وشەی جوان چارەسەر ناکرێن و پێویستی بە کرداری کردەیی هەیە”.
مەسعود پزشکیان سەرۆک کۆماری ئێرانیش هەر ئەمڕۆ لە پەراوێزی کۆبوونەوەی ئەنجومەنی وەزیران لە وڵامی پرسیارێک سەبارەت بە وەرگرتنی پەیام لە لایەن حکومەتی ئەمەریکاوە گوتی: “لە ئێستادا هیچ پەیامێکمان وەرنەگرتووە.”
دوای هاتنە سەر دەستەڵاتی دۆنالد ترەمپ لە ئەمریکا دەنگۆی دەستپێکردنی دانووستانی نێوان ئێران و ئەمریکا لە لایەن مێدیاکانەوە بڵاوکرابۆوە
