عەلی خامنەیی، ڕێبەری باڵای کۆماری ئیسلامی ئێران، ڕۆژی سێشەممە ١٥ی نیسانی ٢٠٢٥، لە کۆبوونەوەیەکدا لەگەڵ بەرپرسانی باڵای سێ دەسەڵاتەکەی وڵاتەکە (یاسادانان، جێبەجێکردن و دادوەری)، ڕایگەیاند: “سەبارەت بە دانوستانەکان کاری باش کراوە”، بەڵام جەختی کردەوە “نابێت پرسەکانی وڵات بە گفتوگۆکانەوە گرێ بدرێت.”
خامنەیی ئاماژەی بەوەشکرد “نابێت گەشبینی و ڕەشبینی زیادەڕۆیانە هەبێت” و گوتی: “بۆ بەدیهێنانی ئامانج لە هەموو بوارێکدا، پێویستە بە خێرایی زیاترەوە بەردەوام بین و هیچ شتێک بە ئەنجامی دانوستانەکانەوە گرێ نەدرێت.”
ڕێبەری ئێران، بە ئاماژەدان بە دانوستانە ئەتۆمییەکانی سەردەمی سەرۆک کۆماری پێشوو، حەسەن ڕۆحانی، کە بووە هۆی ڕێککەوتنی ئەتۆمی ناسراو بە “بەرجام”، گوتی: “ئەو هەڵەیەی لە بەرجامدا کرا و هەموو شتێکی وڵاتی بەستەوە بە پێشکەوتنی دانوستانەکانەوە، نابێت دووبارە بکرێتەوە، چونکە وڵات بەمەرج دەبێت و هەموو شتێک ولەوانەش وەبەرهێنان تا دیاربوونی ئەنجامی دانوستانەکان ڕادەگیرێت.”
ڕیبەری باڵای ئێران هەروەها گوتی: “هەڵگرتنی گەمارۆکان لە دەستی ئێمەدا نییە، بەڵام پووچەڵکردنەوەی گەمارۆکان لە دەسەڵاتی ئێمەدایە و بۆ ئەم کارە ڕێگای زۆر و توانای نێوخۆیی گونجاو هەیە، ئەگەر ئەم ئامانجە بەدی بێت، وڵات بەرانبەر بە گەمارۆکان پارێزراو دەبێت.”
سەبارەت بە دانوستانەکانی عومان، ڕێبەری کۆماری ئیسلامی گوتی: “لە هەنگاوەکانی سەرەتادا بڕیاری وڵات بۆ دانوستان کاری باشی لەسەر کراوە، دوای ئەمەش دەبێت بە وردی بجوڵێینەوە، لە هەمان کاتدا هێڵە سوورەکان بۆ ئێمە و بۆ لایەنی بەرانبەریش بە تەواوی ڕوونن.”
عەلی خامنەیی لە درێژەی قسەکانیدا وتی: “دانوستانەکان لەوانەیە بگەنە ئەنجام یان نا، ئێمەش نە زۆر گەشبینین و نە زۆر ڕەشبینین بەم گفتوگۆیانە، هەرچەندە سەبارەت بە لایەنی بەرانبەر زۆر ڕەشبینین ، بەڵام بە تواناکانی خۆمان گەشبینین.”
هەواڵی پێشوو