رۆژی شەممە لە سلێمانی، دیداری تایبەت بە حاجی کاک ئەحمەدی شێخ بەڕێوەچوو کە بەڕێوبەرایەتی گشتیی رۆشنبیری و هونەری سلێمانی بە هەماهەنگی لەگەڵ رێکخراوی بەرزجا سازکرا.
دیدارەکە بە درووشمی “حاجی کاک ئەحمەدی شێخ، زانای شەریعەت، پیری تەریقەت” و بە ئامادەبوونی حەمەی حەمەسەعید، وەزیری رۆشنبیری و لاوان و ژمارەیەکی بەرچاو لە توێژەرانی ناوخۆیی و دەرەکیی لە هۆڵی تەلاری هونەر بەڕێوەچوو.
لە دیدارەکەدا، ژمارەیەک توێژەری کورد و بیانی بەشداریان کردووە و ژمارەیەک لە توێژەرەکان لە سعوودیە و ئوردنەوە هاتوون و بە توێژینەوە بەشداریان کردووە. لە توێژینەوەکانیشدا باس لە رەهەندە جیاوازەکانی ژیان و بەرهەمی کەسایەتیی بەرجەستەی عیرفان و تەسەوفی کوردی، حاجی کاک ئەحمەدی شێخ کرا.
هەر لەو چوارچێوەیەدا بەڵگەفیلمێک لەبارەی ژیان و بەرهەم و رۆڵ و پێگەی حاجی کاک ئەحمەدی شێخ لە جیهانی تەسەوف و تەریقەت و عیرفانی کوردی و ئیسلامیدا نمایشکرا.