لە میانی پانێڵێکی تایبەت بە زنجیرەی “Gen V”، یەکەمین دیمەنی وەرزی پێنجەم و کۆتایی زنجیرەی بەناوبانگی پاڵەوانێتی “The Boys” بڵاوکرایەوە و کاردانەوەی ئەرێنیی بەدوای خۆیدا هێنا.
بەگوێرەی ماڵپەڕی “Deadline”، دیمەنە کورتەکە کارەکتەری هۆملاندەر نیشان دەدات کە بووەتە سەرکردەی راستەقینەی ئەمریکا و رایدەگەیەنێت کە لەژێر دەسەڵاتی ئەودا، وڵات “ئارامتر و ترسناکتر” دەبێت.
دیمەنەکان پڕبوون لە خوێن و توندوتیژی کە ستایلی ناسراوی زنجیرەکەیە.
گرتە ڤیدیۆییەکە بە دیمەنێکی نزیکی کارەکتەری ئاشلی بارێت کۆتایی دێت، کە زەردەخەنەیەکی گاڵتەجاڕانە دەکات و وردە وردە دەموچاوی دەگۆڕێت، ئەمەش ئاماژەیە بۆ رووداوی چاوەڕواننەکراو لە وەرزی کۆتاییدا.