لە هەولێر بەگوژمەی ( 12 ملیۆن دۆلار ) بەردی بناغەی دروستكردنی ( کۆمەڵگەیەکی پەروەردەیی لە دارەتوو ) و ( سەنتەرێكی ڕاهێنانی مامۆستایان لە هەولێری نوێ ) و ( نۆژەنکردنەوەی 10 قوتابخانە و کتێبخانەی زەیتونە ) دانرا
ئەمڕۆ یەکشەممە، 2025.9.28، بە ئامادەبوونی ئالان حەمە سەعید، وەزیری پەروەردە و ئومێد خۆشناو، پارێزگاری هەولێر و سەفین دزەیی، بەرپرسی فەرمانگەی پەیوەندیەکانی دەرەوەی حكومەتی هەرێم و سیۆنگ چیۆل لیم، کونسوڵی گشتی کۆماری کۆریای باشوور لە هەولێر و جون یۆنگ جۆنگ، سەرۆکی ئاژانسی کۆیکا لە هەولێر و ژمارەیەكی تر لە بەڕێوەبەرانی گشتیی لە وەزارەتەکانی حکومەتی هەرێم و بەرپرسانی دیكەی حکومی، لە ڕێورەسمێكدا بەگوژمەی( 12 ملیۆن دۆلار ) لە سەر بودجەی ئاژانسی کۆیکا و بە سەرپەرشتی وەزارەتی پەروەردەی حکومەتی هەرێم و هەماهەنگی فەرمانگەی پەیوەندیەکانی دەرەوە، بەردی بناغەی ( کۆمەڵگەیەکی پەروەردەیی لەناحییەی دارەتوو ) و ( سەنتەرێكی ڕاهێنانی مامۆستایان لە هەولێری نوێ ) و ( نۆژەنکردنەوەی 10 قوتابخانە لە هەولێر ) و ( نۆژەنکردنەوەی کتێبخانەی زەیتونە ) دانرا.
لە ڕێورەسمەكەدا، لەچەند وتارێك، وێڕای نیشاندانی خۆشحاڵی بە ئەنجامدانی ئەو پڕۆژانە لە سنووری پارێزگای هەولێر، سوپاسی ئاژانسی كۆیكا و کونسوڵی گشتی کۆماری کۆریای باشوور و سەرۆكی ئاژانسەكە لە هەولێر كرا و کار و چالاکی و پڕۆژەکانی ئاژانسی ناوبراو و هاوکاری و هەماهەنگیەكانی لەگەڵ حکومەتی هەرێمی کوردستان بەرز نرخێندرا، کە لە ساڵانی ڕابردوودا، لە چەندین پڕۆژەی گرنگ و جۆراوجۆردا، هاوکاری حکومەتی هەرێمی کوردستانیان کردووە.
لەلایەن خۆشیەوە، پارێزگاری هەولێر، وێڕای دەستخۆشی، ئومێدی خواست، هاریکاریی و هەماهەنگییەكانیان ئاژانسی كۆیكا لەگەڵ حكومەتی هەرێمی کوردستان لەوەی هەیە فراوانتر بکرێت و پەرەی زیاتر بە پڕۆژەكانیان بدەن لە سنووری پارێزگای هەولێر، تاكو سوودی پتر لە ئەزموونی سەرکەوتوو و دەوڵەمەندیى كۆریكا لە بواری ئاوەدانکردنەوە و گەشەپێدان و داهێنان وەربگیرێت.
جێگەی باسە، ئاژانسی کۆیکا ئاژانسێکی حکومییە و سەر بە وڵاتی کۆریای باشوورە، پرۆگرام و ئەجێندای یارمەتی خێرخوازییە و پرۆگرامەکانی تەکنیکی و هاوکاری وڵاتان جێبەجێ دەکات، ئاژانسەکە لە سەرەتای کارکردنیان لە ساڵی 2004 ەوە تاوەکو ئێستا چەندین پرۆژەی ستراتیژیی جێبەجێ کردووە و هەزاران فەرمانبەری حکومەتی هەرێمی کوردستانیش سوودیان لە خوولەکانی ڕاهێنانی کۆیکا لە وڵاتی کۆریا بینیوە.