وەزارەتی جەنگی ئەمەریکا ‘پێنتاگۆن’ ڕایگەیاند، دەستیان بەکەمکردنەوەی سوپای ئەمەریکا لە عێراق کرد، ئەم هەنگاوەشی بە “سەرکەوتنی هاوبەش” لە شەڕی دژی داعش وەسف کردووە.
شۆن بارنێل، گوتەبێژی پێنتاگۆن لەوبارەوە گوتی: “بەگوێرەی ڕێنماییەکانی سەرۆکی ئەمەریکا بەهەماهەنگی کارەکانی لیژنەی باڵای سەربازی ئەمەریکا-عێراق، ڕاگەیەندراوێکی هاوبەشیان لە 27ـی ئەیلوولی 2024 بڵاوکردەوە، کە ئەمەریکا و هاوپەیمانەکانیان ئەرکی سەربازی خۆیان لە عێراق کەمدەکەنەوە.”
ئاماژەی بەوەشکرد، ئەم کەمکردنەوەیە ڕەنگدانەوەی سەرکەوتنی هاوبەشمانە لە بەرەنگاربوونەوەی داعش، هەروەها هەنگاوێکیشە بۆ هاوبەشییەکی ئەمنی بەردەوامی نێوان ئەمەریکا و عێراق، کە گونجاو بێت لەگەڵ بەرژەوەندییەکانی ئەمەریکا و دەستووری عێراق و ڕێککەوتنی چوارچێوەی ستراتیژی ئەمەریکا و عێراق.
شۆن بارنێل باسی لەوەشکرد، “ئەم هاوبەشییە پاڵپشتی ئاسایشی ئەمەریکا و عێراق دەکات، هەروەها توانای عێراق بۆ گەشەپێدانی ئابووری و ڕاکێشانی وەبەرهێنانی بیانی و وەرگرتنی ڕۆڵی سەرکردایەتی ناوچەیی بەرزدەکاتەوە، حکوومەتی ئەمەریکا بەردەوام دەبێت لە هەماهەنگییەکانی لەگەڵ حکوومەتی عێراق و هاوپەیمانان بۆ دەستەبەرکردنی گواستنەوەیەکی ڕێکوپێک.”
هەروەها پێنتاگۆن ژمارەی ئەو سەربازانەی ئاشکرا نەکردووە کە دەیانکێشێتەوە و ئەوانەشی لە عێراق دەمێننەوە
لە کۆتایی مانگی ئابدا، سەرچاوە ئەمنییەکانی عێراق ئاماژەیان بەوەدا کە بەشێک لە هێزەکانی ئەمەریکا بنکەکانیان لە عێراق جێهێشتووە، وەک بنکەی عەین ئەسەد لە پارێزگای ئەنبار و ڤیکتۆریا لە نزیک فڕۆکەخانەی بەغدا. پێشبینی دەکرێت ژمارەیەکی کەم لە سەربازەکان وەک ڕاوێژکار و مەشقپێکردنی سەربازانی عێراق بمێننەوە.
ئەم کەمکردنەوەیە لە چوارچێوەی ڕێککەوتنێکی پێشووی نێوان بەغدا و واشنتن دێت کە دەبێت تا کۆتایی ئەم مانگە عێراق بەجێبهێڵن، بەگوێرەی ڕاپۆرتەکانی پێشوو، نزیکەی دوو هەزار و 500 سەربازی ئەمەریکی لە عێراقدا بوونیان هەیە.