راوێژکاری ئاسایشی نیشتیمانی عێراق جەخت لەوەدەکاتەوە، رێگەنادەن لەخاکی عێراقەوە هێرشبکرێتەسەر وڵاتانی دراوسێ.
قاسم ئەعرەجی راوێژکاری ئاسایشی نیشتیمانی عێراق، لەمیانی کۆبوونەوەی لەگەڵ پاتریک دۆرێل باڵیۆزی فەڕەنسا لە بەغدا، رایگەیاند، هەماهەنگییەکانی پاریس و بەغدا لە رووبەڕووبوونەوەی تیرۆر بەردەوامە، عێراق هەرگیز رێگە نادات خاکەکەی بۆ هێرشکردنە سەر وڵاتانی دراوسێ بەکاربهێنرێت.
ئەعرەجی ئاماژەی بەوەش کرد، عێراق سوورە لەسەر پەرەپێدانی پەیوەندییەکانی لەگەڵ ئەمریکا و جێبەجێکردنی سەرجەم ئەو بەندانەی لە رێککەوتنی ستراتیژی هەردوولادا هاتووە.
راوێژکاری ئاسایشی نیشتیمانی عێراق، گوتیشی، عێراق چیتر قبوڵ ناکات خاکەکەی بۆ یەکلایکردنەوەی ململانێ هەرێمییەکان بەکاربهێنرێت.