ئەنجوومەنی لۆردەکانی بەریتانیا بە ٢٦١ دەنگی بەڵێ بەرانبەر ١٥٠ دەنگی نەخێر، پڕۆژەیاسای پێشنیارکراوی بۆ قەدەغەکردنی دەستگەیشتنی منداڵان و مێرمنداڵانی خوار ١٦ ساڵ بە پلاتفۆرمەکانی میدیای کۆمەڵایەتی پەسەند کرد؛ بەمەش گوشارەکان بۆ سەر حکوومەتەکەی کیر ستارمەر بە مەبەستی جێبەجێکردنی یاسایەکی هاوشێوەی ئوسترالیا زیاتر بوون.
ئەم پێشنیارە کە ڕۆژی چوارشەممە ٢١ی کانوونی دووەم خرایە دەنگدانەوە، وەک پاشکۆیەک بۆ پڕۆژەیاسای خۆشگوزەرانیی منداڵان و قوتابخانەکانی حکوومەت زیاد کرا. حکوومەت پێشتر ڕایگەیاندبوو ئەم پاشکۆیە قبووڵ ناکات و ئێستا پرسەکە ئاراستەی ئەنجوومەنی نوێنەران (عەوام) دەکرێتەوە. بە گوتەی لایەنگرانی پڕۆژەکە، ئەم قەدەغەکردنە بۆ ڕێگریکردن لە زیانی کارەساتبار بۆ نەوەی گەنج پێویستە و لەلایەن پزیشکان، پۆلیس، مامۆستایان و دایک و باوکانەوە پاڵپشتییەکی بەرفراوانی لێ دەکرێت.
حکوومەتەکەی ستارمەر بۆ تاوتوێکردنی سوود و زیانەکانی قەدەغەکردنێکی لەم شێوەیە، ڕاوێژێکی سێ مانگەی دەست پێ کردووە و ئەنجامەکەی لە وەرزی هاویندا ڕادەگەیەنرێت. لەگەڵ ئەوەشدا زیاتر لە ٦٠ پەرلەمانتاری پارتی کرێکاران لەگەڵ پارێزگاران و لیبڕاڵ دیموکراتەکان پاڵپشتییان لەم پێشنیارە کردووە. ئەم دەنگدانە دوای جێبەجێکردنی یاسایەکی هاوشێوە لە ئوسترالیا دێت کە لە مانگی تشرینی دووەمی ڕابردووەوە کاری پێ دەکرێت؛ لەوێ پلاتفۆرمەکانی وەک تیکتۆک، ئینستاگرام و سناپچات ناچار کراون هەژماری بەکارهێنەرانی خوار ١٦ ساڵ لابدەن و لە ئەگەری سەرپێچیدا ڕووبەڕووی سزای داراییی قورس دەبنەوە.