فیلمی سینەمایی “Avatar: Fire and Ash” کە بەرهەمی کۆمپانیای (20th Century)یە، بەردەوامە لە تۆمارکردنی سەرکەوتنی گەورە و داهاتەکەی لە بۆکس ئۆفیسی جیهانیدا گەیشتە یەک ملیار و 413 ملیۆن و 826 هەزار دۆلار.
ئەم فیلمە کە ماوەکەی 3 کاتژمێر و 17 خولەکە، لە مانگی کانوونی یەکەمی ساڵی ڕابردووەوە نمایشکراوە و توانیویەتی تەنها لە ئەمریکا 386 ملیۆن دۆلار کۆبکاتەوە.
چیرۆکی ئەم بەشەی ئەڤەتار باس لە خێزانی “جەیک و نەیتیری” دەکات کە ڕووبەڕووی خەمێکی قورس دەبنەوە و لە هەمان کاتدا هۆزێکی نوێی “ناڤی” دەناسن بە ناوی “گەلی خۆڵەمێش” کە هۆزێکی ئاگرینن و لەژێر فەرمانی “فارانج”دان. ململانێکان لەسەر هەسارەی پاندۆرا توندتر دەبن و ڕەهەندی ئەخلاقی نوێ دەردەکەون.
فیلمەکە بە دەرهێنانی جەیمس کامیرۆنە و کۆمەڵێک ئەستێرەی وەک سام وۆرسینگتۆن، زۆی سالدانا، کەیت وینسڵێت و سیگۆرنی ویڤەر تێیدا بەشدارن و بە یەکێک لە گەورەترین بەرهەمە سینەماییەکانی سەدە دادەنرێت.