بەڕێوەبەرایەتی گشتی هاتووچۆی عێراق سەبارەت به پێشنیازێکی پەرلەمان روونکردنەوەی دا کە هاوردەکردنی ئۆتۆمبێلی نوێ دەبەستێتەوە بە هەڵوەشاندنەوە (تەسقیتکردن)ی مۆدێلە کۆنەکان.
بەڕێوەبەری گشتی هاتووچۆی عێراق، فەریق عودەی سەمیر، سەبارەت بەو پێشنیازەی کە داوای هاوردەکردنی 100 هەزار ئۆتۆمبێل ساڵانە دەکات لە بەرامبەر هەڵوەشاندنەوەی مۆدێلە کۆنەکان، ڕایگەیاند: “ئەم جۆرە پێشنیازانە ڕەنگدانەوەی ڕوکارێکی شارستانییە و بەشدارە لە بەرەوپێشبردنی ڕەوشی هاتووچۆ، بەڵام ئەرکی سەرەکی بەڕێوەبەرایەتی هاتووچۆ چڕبووەتەوە لەسەر ڕێکخستنی جوڵەی ئۆتۆمبێل، تۆمارکردنی مەرکەبەکان و ئاسانکاری بۆ هاوڵاتیان.”
گرنگترین خاڵەکانی لێدوانەکە:
• پلاندانانی ستراتیژی: پڕۆسەی دانانی میکانیزم بۆ هاوردەکردنی ئۆتۆمبێل پێویستی بە پلاندانانی ورد هەیە کە فەرمانگە پەیوەندیدارەکان تێیدا بەشداربن، ئەمەش کارێکە سپێردراوە بە وەزارەتی پلاندانان.
• لیژنەی تایبەت: هەر پڕۆژەیەکی لەم شێوەیە عادەتەن بە فەرمانێکی دیوانی و لە ڕێگەی پێکهێنانی لیژنەی تایبەتمەند لە هەموو لایەنە پەیوەندیدارەکانەوە دەردەچێت.
• خێراکردنی مامەڵەکان: بەڕێوەبەرایەتییەکە کار لەسەر کەمکردنەوەی ڕۆتین دەکات؛ ئێستا هاوڵاتی دەتوانێت لە ماوەی تەنها نیو کاتژمێردا مامەڵەکانی لە ناوەندە مۆدێرنەکانی تۆمارکردن تەواو بکات.
پاشخان و ئامانجی پێشنیازەکە:
پێشتر فالح خەزعەلی، سەرۆکی کوتلەی “منتصرون”ی پەرلەمانی، پێشنیازێکی خستبووە ڕوو بۆ هاوردەکردنی 100 هەزار ئۆتۆمبێل ساڵانە لە بەرامبەر هەڵوەشاندنەوەی مۆدێلە کۆنەکان و پێدانی ڕەسمێکی دارایی بە بڕی 4 هەزار دۆلار. ئاماژەی بەوەش کردبوو کە ئەم پڕۆژەیە داهاتێکی زۆر بۆ بودجەی دەوڵەت دابین دەکات و ڕێژەی ڕووداوەکانی هاتووچۆ و پیسبوونی ژینگەکەم دەکاتەوە.