موراد ئیسماعیل، پەرلەمانتاری پێکهاتەی ئێزدی داوای کرد کە “یەکینەکانی پاراستنی شنگال” تێکەڵی ناو دامەزراوە ئەمنییە عێراقییەکان بکرێن، بە مەبەستی بەهێزکردنی سەقامگیری لە قەزای شنگال و کۆتاییهێنان بە فرەیی لایەنە چەکدارەکان لە ناوچەکەدا.
ئیسماعیل لە بەیاننامەیەکدا ڕوونی کردەوە کە پێشنیازەکە داوای تێکەڵکردنی ئەم هێزانە دەکات لە چوارچێوەی “قەوارەیەکی نیشتمانیی ناسیاسی سەر بە وەزارەتی بەرگری یان وەزارەتی ناوخۆ، و یان لە ڕێگەی پێکهاتەیەکی ئەمنییەوە کە ڕاستەوخۆ بە نووسینگەی سەرۆک وەزیرانەوە بەستراوەتەوە، بەجۆرێک کە یەکخستنی بڕیاری ئەمنی لەژێر دەسەڵاتی دەوڵەتدا مسۆگەر بکات.”
ئەو ئاماژەی بەوەش کرد کە “گواستنەوەی هێزەکان لە نێوان پێکهاتە ئەمنییە ناسەقامگیرەکاندا سەقامگیرییەکی درێژخایەن بەدی ناهێنێت”، جەختیشی کردەوە کە “کێشە بنەڕەتییەکە لە گرێدانی ئەمنییەتی دانیشتووان بە ئەجێندا سیاسییەکان یان جیۆپۆلیتیکییەکانەوەیە، ئەمەش پێویستی بە جیاکردنەوەی کاری ئەمنی لە ململانێ سیاسییەکان هەیە.”
ئیسماعیل تەئکیدی کردەوە کە بەدیهێنانی سەقامگیری ڕاستەقینە لە شنگال “بەندە بە تێکەڵکردنی هەموو پێکهاتە چەکدارەکان لە ناو دامەزراوە دەستوورییەکانی عێراقدا، و ملکەچبوونیان بۆ دەسەڵاتی فەرماندەی گشتی هێزە چەکدارەکان لەگەڵ لێپرسینەوەی یاسایی تەواو و دڵسۆزی بۆ دەوڵەت و دەستوور.”
هەروەها جەختی لەسەر پێویستی دابینکردنی گەرەنتی ئەمنی ڕاستەقینە بۆ ئێزدییەکان و دانیشتووانی ناوچەکە کردەوە، بەتایبەت دوای ئەو جینۆسایدەی کە ڕووبەڕوویان بووەوە. داوایشی کرد کە خەڵکی ناوچەکە بەشدار بن لە پاراستنی ناوچەکانی خۆیان لە چوارچێوەی دەوڵەت و سەروەریەکەیدا، بەجۆرێک کە متمانە بەهێز بکات و ڕێگە بۆ سەقامگیرییەکی هەمیشەیی خۆش بکات.