فیلمی ترسناکی “Scream 7” لە یەکەم هەفتەی نمایشکردنیدا لە ئەمریکا، بڕی زیاتر لە 60 ملیۆن دۆلاری کۆکردەوە.
ئەمە نەک تەنیا باشترین دەستپێکی زنجیرە فیلمەکانی “Scream”ـە ، بەڵکو گەورەترین دەستپێکی فیلمە لە ساڵی 2026ـدا تا ئێستا. ئەم سەرکەوتنە گەورەیە لە کاتێکدایە کە کۆمپانیای پارامۆنت و سکایدانس لە هەوڵی کڕینەوەی وارنەر برۆسدان، کە ئەمەش گەورەترین ڕێککەوتنی بازرگانییە لە مێژووی هۆلیووددا و دەبێتە هۆی کەمبوونەوەی ستۆدیۆ گەورەکانی فیلم لە پێنج ستۆدیۆوە بۆ چوار.
یەکێک لە هۆکارە سەرەکییەکانی سەرکەوتنی ئەم بەشە، گەڕانەوەی ئەکتەری سەرەکی، نیڤ کامبڵ بوو بۆ ڕۆڵی “سیدنی پریسکت”، دوای ئەوەی لە بەشی پێشوودا بەشداری نەکردبوو.
سەرەڕای ئەوەی ڕەخنەگران نمرەیەکی نزمیان بە فیلمەکە داوە (33٪ لە ڕاتن تۆمەیتۆز)، بەڵام جەماوەر بە جۆش و خرۆشێکی زۆرەوە ڕوویان لە سینەماکان کردووە و نمرەی 78٪یان پێ بەخشیوە.
کیڤن ویلیامسۆن، کە نووسەری بەشە ڕەسەنەکانی ئەم زنجیرەیەیە، دەرهێنانی بۆ ئەم بەشە کردووە و چیرۆکەکە باس لە گەڕانەوەی سیدنی دەکات بۆ شارۆچکەیەک لەگەڵ کچەکەی، کە لەوێدا ڕووبەڕووی بکوژێکی نوێ دەبێتەوە کە دەمامکی “Ghostface”ی پۆشیوە.
بەکارهێنانی تەکنەلۆژیای ئایماکس بۆ یەکەمجار لەم زنجیرەیەدا، ڕۆڵێکی گرنگی هەبووە لە زیادکردنی داهاتی فیلمەکە و ڕاکێشانی نەوەی نوێ(Gen Z) بۆ ناو هۆڵەکانی سینەما.