دەزگای هەواڵی ئیرنای ئێران بڵاوی كرده‌وه كه سەرۆکی ئێران ئیبراهیم ڕەئیسی رایگه‌یاند، دەکرێت هێرشی ئیسڕائیل بۆ سەر خاکی ئێران، دۆخەکە بە تەواوەتی بگۆڕێت و ببێتە هۆی ئەوەی هیچ شتێک بۆ “ڕژێمی زایۆنی“ نەمێنێتەوە.
ڕۆژی دووشەممە ڕەئیسی سەردانە سێ ڕۆژەییەکەی بۆ پاکستان دەستپێکرد و بەڵێنیداوە بازرگانییەکان لەگەڵ پاکستانی دراوسێیدا بۆ ساڵانە 10 ملیار دۆلار زیاد بکات.
ڕەئیسی لە وتارەکەیدا لە لاهۆری پاکستان وتی ” کۆماری ئیسلامی ئێران بە شانازییەوە بەردەوام دەبێت لە پشتیوانیکردن لە شۆڕشی فەلەستینییەکان.”
ڕۆژی هەینی دەنگی تەقینەوە بەسەر ئاسمانی شاری ئەسفەهانی ئێراندا بیسترا و سەرچاوەکانیش دەڵێن هێرشی ئیسڕائیل بووە، بەڵام تاران ڕووداوەکەی بە کەم زانی و وتی پلانی نیە بۆ وەڵامدانەوە.
لە 13 ی مانگی چواردا ئێران سەدان موشەک و فڕۆکەی بێفڕۆکەوانی ئاڕاستەی ئیسڕائیل کرد، ئەوەش وەکو وەڵامێک بۆ ئەو هێرشەی کە لە 1 ی مانگی چواردا کرایە سەر باڵیۆزخانەی ئێران لە دیمەشق، کە بووە هۆی کوژرانی چەند ئەفسەرێکی باڵای سوپای ئێران، هێرشەکەش خرایە پاڵ ئیسڕائیل. بەڵام نزیکەی سەرجەم موشەک و فڕۆکە بێفڕۆکەوانەکانی ئێران خرانە خوارەوە.