یەکێتیی ئەورووپا داوای لە ئیسرائیل کرد هێرشەکانی بۆ سەر لوبنان ڕابگرێت

بەرپرسی سیاسەتی دەرەوەی یەکێتیی ئەورووپا، کایا کالاس، گوتی: “هەنگاوەکانی ئیسرائیل زیانێکی قورس بە ئاگربەستی نێوان ئەمریکا و ئێران دەگەیەنن. دەبێت ئەم ئاگربەستە لوبنانیش بگرێتەوە.”
کالاس هەروەها گوتیشی: “حیزبوڵڵا، لوبنانی پەلکێشی شەڕ کرد، بەڵام مافی ئیسرائیل بۆ بەرگریکردن لە خۆی، پاساو بەم وێرانکارییە بەرفراوانە بەرانبەر بە لوبنان نادات.”
بە گوتەی کالاس: “هێرشەکانی شەوی ڕابردووی ئیسرائیل سەدان کەسیان کوشت و ئەم بابەتە بەرگریکردن لەوەی ئەم جۆرە هەنگاوە قورسانە بچنە چوارچێوەی بەرگریی ڕەواوە، سەخت دەکات.” ئەو هەروەها جەختی کردەوە: “دەبێت حیزبوڵڵا چەک بکرێت، ڕێک هەمان جۆر پێشتر ڕێککەوتنی لەسەر کراوە. یەکێتیی ئەورووپا پشتگیری لە هەوڵەکانی حکوومەتی لوبنان بۆ چەککردنی ئەم گرووپە پاڵپشتیکراوەی ئێران دەکات.”