پڕۆژەکانی خزمەتگوزاری لە پارێزگای دهۆک بەردەوامن و لە نوێترین هەنگاودا، دەست بە نۆژەنکردنەوە و چاککردنی هەردوو سایدی ڕێگای سەرەکیی (ئالۆکا – بەدریکێ) کرا. ئەم پڕۆژەیە بە مەبەستی باشترکردنی دۆخی ڕێگاوبانەکان و کەمکردنەوەی گرفتەکانی هاتوچۆ لە دەڤەرەکەدا خراوەتە بواری جێبەجێکردنەوە.
لە چوارچێوەی ئەم پڕۆژەیەدا، کار لەسەر پڕکردنەوە و چاککردنی سەرجەم ئەو چاڵ و تێکچوونانە دەکرێت کە لەسەر درێژایی ئەو ڕێگایە دروستبوون و ببوونە هۆی زەحمەتکردنی هاتوچۆی شۆفێران. تیمە ئەندازیاری و تەکنیکییەکان بە شێوەیەکی بەردەوام کار دەکەن بۆ ئەوەی لە کورتترین ماوەدا پڕۆژەکە بە کوالێتییەکی بەرز کۆتایی پێبهێنن و مەترسییەکانی ڕووداوی هاتوچۆ کەم بکەنەوە.
ڕێگای (ئالۆکا – بەدریکێ) بە یەکێک لە ڕێگا ستراتیژی و سەرەکییەکانی پارێزگای دهۆک دادەنرێت، نۆژەنکردنەوەی ئەم ڕێگایە کاریگەرییەکی ئەرێنی گەورەی دەبێت لەسەر ئاسانکاریی هاتوچۆی هاووڵاتییان.