ئەندامێكی ئەنجومەنی نوێنەرانی عێراق لە فراكسیۆنی پارتی دیموكراتی كوردستان رایگەیاند، کە وردبینیی لیستی مووچەی فەرمانبەران و مووچەخۆرانی كوردستان تەواو دەكرێت، دوای ناردنی تەمویل، وەزارەتی دارایی و ئابووریی حكوومەتی هەرێمی كوردستان دەست بە دابەشكردنی مووچەی مانگی چوار دەكات.
شێروان دووبەردانی، ئەندامی ئەنجومەنی نوێنەرانی عێراق لە فراكسیۆنی پارتی دیموكراتی كوردستان، بە ئاژانسی هەواڵی زاگرۆسی راگەیاند: زانیاریمان لە وەزارەتی دارایی عێراق وەرگرتووە، وردبینیی لیستی مووچەی فەرمانبەران و مووچەخۆرانی كوردستان تەواو دەكرێت، ئەگەرچی لەم هەفتەیەدا چوارشەممە پشوو دەبێت، بەڵام بڕیارە تەمویلی مووچە بنێردرێت.
ئەندامی ئەنجومەنی نوێنەرانی عێراق لە فراكسیۆنی پارتی دیموكراتی كوردستان گووتی: لەم مانگەدا عێراق خۆی كێشەی پارەی نەختینەی هەبوو، مووچەی وەزارەتەكانی عێراقیش تەواو نەبووە، وردبینیی لیستیش دوا كەوت، ئەگەرنا هیچ گرفتێك نییە و تەمویلی مووچە دەنێردرێت.
هەروەها شێروان دووبەردانی، ئەندامی ئەنجومەنی نوێنەرانی عێراق لە فراكسیۆنی پارتی دیموكراتی كوردستان ئەوەشی بۆ ئاژانسی هەواڵی زاگرۆس خستەروو، کە دوای ناردنی تەمویل، وەزارەتی دارایی و ئابووریی حكوومەتی هەرێمی كوردستان دەست بە دابەشكردنی مووچەی مانگی چوار دەكات، لە ماوەیەكی كورتدا مووچە تەواو دەكرێت.
رێباز یونس