وەزارەتی وزەی ئەمریکا، ئەمڕۆ سێشەممە، 12-5-2026، ڕایگەیاند، پێدەچێت تا کۆتایی مانگی ئایار گەرووی هورمز بە ڕووی کەشتییەکاندا بە داخراوی بمێنێتەوە.
بەپێی ڕاگەیەندراوێکی فەرمیی وەزارەتەکە، چاوەڕوان دەکرێت لە مانگی حوزەیرانی داهاتووەوە، گەشتی کەشتییەکان بە شێوەیەکی پلەبەندی دەستپێبکاتەوە.
وەزارەتەکە ئاماژەی بەوەش کردووە: “پێشبینی دەکەین لە کۆتاییەکانی ئەمساڵدا، بارودۆخی کەشتیوانی لە گەرووی هورمز بگەڕێتەوە بۆ دۆخی پێش هەڵگیرسانی جەنگ.”
ڕێکارە سەربازییەکانی ئەمریکا
لە لایەکی دیکەوە، فەرماندەیی ناوەندیی هێزەکانی ئەمریکا (سێنتکۆم) ئاشکرای کرد، لە دوای سەپاندنی گەمارۆکان بەسەر ئێراندا، چەندین ڕێکاری توندیان گرتووەتە بەر، لەوانە،
گۆڕینی ڕێڕەوی 65 کەشتیی بازرگانی بۆ دوورکەوتنەوە لە ناوچە مەترسیدارەکان.
ڕاگرتن و پەکخستنی 4 کەشتی کە پابەندی ڕێکارە دیاریکراوەکان نەبوون.
ئەم ئاڵۆزییانە لە کاتێکدایە کە سوپای پاسدارانی ئێران، بەیانی ئەمڕۆ سێشەممە، ڕایگەیاند، سنووری ناوچەی گەرووی هورمزیان فراوانتر کردووە بە شێوەیەک کە کەناراو و دوورگە نوێیەکانی ئێران بگرێتەوە.
داخستنی گەرووی هورمز و گەمارۆ دەریاییەکان، کاریگەری ڕاستەوخۆی لەسەر بازاڕی وزە و هێڵە بازرگانییەکانی جیهان دروست کردووە.