ڤلادیمیر پوتین، سەرۆکی ڕووسیا، گەشتێکی دوو ڕۆژەی بۆ چین دەست پێ کرد. پوتین لەم گەشتەدا لەگەڵ شی جین پینگ، سەرۆکی چین، پەرەپێدانی پێوەندییە دووقۆڵییەکان و پرسە جیهانییەکان تاوتوێ دەکات.
شاندێکی باڵای وەزیران و سەرۆکی کۆمپانیا گەورەکانی وزە هاوڕێیەتیی پوتین دەکەن، ئەمەش گرنگیی پێوەندییەکانی مۆسکۆ و پەکین لە ژێر سێبەری سزاکانی ڕۆژاوا نیشان دەدات.
کرێملین ڕایگەیاند هەردوو سەرۆک لە گفتوگۆکانیاندا پەرەپێدانی هاوبەشیی ستراتیژی و دۆسیە نێودەوڵەتییەکانی وەک جەنگی ئۆکراینا و گۆڕانکارییەکانی ئێران تاوتوێ دەکەن. پوتین جەختی کردەوە پێوەندییەکانیان گەیشتووەتە ئاستێکی بێوێنە و ئامانجیان پاراستنی سەقامگیری و هەوڵدان بۆ ئاشتییە.
یوری ئۆشاکۆف، ڕاوێژکاری کاروباری دەرەوەی پوتین، گوتی پێوەندییەکانی ڕووسیا و چین دژی هیچ لایەنێک نییە. ئۆشاکۆف ئاماژەی بەوەش دا هەناردەی نەوتی ڕووسیا بۆ چین لە سێ مانگی یەکەمی ساڵی ٢٠٢٦دا بە ڕێژەی لەسەدا ٣٥ زیادی کردووە. پڕۆژەی هێڵی گازی “هێزی سیبیریا ٢” یەکێک لە تەوەرە سەرەکییەکانی گفتوگۆکان دەبێت.