ئەستێرەی جیهانی، شارلیز سیرۆن، مشتومڕێکی دروست کرد دوای ئەوەی بە گاڵتەجاڕییەوە رەخنەی لە ئاهەنگی هاوسەرگیریی گرانبەهای ملیاردێر جێف بیزۆس و لۆرین سانشێز گرت، کە بە بەهای 55 ملیۆن دۆلار لە شاری ڤێنیسیای ئیتالیا بەڕێوەچوو.
لە میانی ئاهەنگێکی خێرخوازیی تایبەت بە پڕۆژەکەی خۆی بۆ “پشتگیریکردنی ئەفریقا”، سیرۆن بە گاڵتەجاڕییەوە گوتی: “پێموایە ئێمە تاکە کەس بووین بانگهێشتی ئاهەنگەکەی بیزۆس نەکرابووین، بەڵام کێشە نییە، چونکە ئەوان خراپن و ئێمە نایابین”.
ناوبراو لە وتارەکەیدا ئاماژەی بە قەیرانە جیهانییەکان کرد و گوتی: “جیهان دەسووتێت و مافەکانی مرۆڤ لە پاشەکشەدایە.”
قسەکانی بە وتەیەکی راستەوخۆ کۆتایی پێهێنا کە کاردانەوەی زۆری لێکەوتەوە: “بەڵێ، نەفرەتیان لێ بێت”.
ئاهەنگە گرانبەهایەکە رووبەڕووی ناڕەزایەتی بووەوە و سەدان کەس لە شەقامەکانی ڤێنیسیا دژی “بەکارهێنانی شارەکە بۆ مەبەستی بازرگانی و خۆنواندن” خۆپیشاندانیان کرد.
ئاهەنگەکە بە ئامادەبوونی کەسایەتییە دیارەکانی وەک لیۆناردۆ دیکاپریۆ، کیم کارداشیان و بیڵ گەیتس بەڕێوەچوو.