کێت وینسلێت، ئەستێرەی جیهانیی تەمەن 50 ساڵ، پەردەی لەسەر سەختییەکانی یەکەم کاری دەرهێنانی لادا و ڕایگەیاند، ئەنجامدانی چەندین ئەرک لە یەک کاتدا لە فیلمی (Goodbye June)دا، ئاڵنگارییەکی گەورە بووە بۆی.
وینسلێت لە چاوپێکەوتنێکدا لەگەڵ (Digital Spy) ئاماژەی بەوە کرد، کە سیناریۆی فیلمەکە لەلایەن جۆ ئەندەرزی کوڕییەوە نووسراوە. سەرەتا تەنیا مەبەستی بووە وەک بەرهەمهێنەر و ئەکتەر بەشدار بێت، بەڵام دواتر بڕیاری داوە ئەرکی دەرهێنانیش بگرێتە ئەستۆ.
وینسلێت دەڵێت: “دەزانم لە ئەنجامدانی چەندین کار لە یەک کاتدا باشم، بەڵام ئەمەیان زۆر بوو”.
ئەو خانمە ئەستێرەیە هەوڵی داوە ڕۆڵەکەی خۆی بداتە ئەکتەرێکی دیکە، بەڵام ستافی فیلمەکە و کۆمپانیای نێتفلێکس ڕەزامەند نەبوون. وینسلێت گوتیشی: “کاتێک نێتفلێكس وتی نەخێر و کۆمەڵێک ئەکتەری گەورەی وەک هێلین مێرین و تۆنی کۆلێت-یش لە فیلمەکەدا بوون، چۆن دەبوو ڕۆڵیان لەگەڵدا نەگێڕم؟”