دەرهێنەر و نووسەری بەناوبانگ نانسی مایەرز بڕیاریدا دوای 11 ساڵ دوورکەوتنەوە، بگەڕێتەوە بۆ جیهانی سینەما.
فیلمە نوێیەکەی کە هێشتا ناوی لێنەنراوە، فیلمێکی کۆمیدی و ڕۆمانسییە و بڕیارە لە 25ی کانوونی یەکەمی 2027 لە لایەن ستۆدیۆکانی “وارنەر برادەرز”ـەوە بڵاوبکرێتەوە. کۆمەڵێک ئەکتەری ناودار وەک پێنێلۆپی کروز، کیران کوڵکین، جود لۆ و ئۆین ویڵسن بەشداری تێدا دەکەن.
چیرۆکی فیلمەکە باس لە گروپێک دەکات کە خەریکی دروستکردنی فیلمێکن و تیشک دەخاتە سەر نهێنییەکانی ئەو پڕۆسەیە.
سەرەتا بڕیار وابوو ئەم پڕۆژەیە لەگەڵ کۆمپانیای “نێتفلێکس” بێت، بەڵام بەهۆی ناکۆکی لەسەر بودجەی فیلمەکە کە گەیشتە 150 ملیۆن دۆلار، نێتفلێکس ڕەتی کردەوە و تەنیا 130 ملیۆن دۆلاری تەرخان کرد، ئەمەش بووە هۆی شکستی گفتوگۆکان.
دواتر وارنەر برادەرز پڕۆژەکەی گرتە ئەستۆ و دەستی بە گەشەپێدانی سیناریۆکە کرد.
نانسی مایەرز کە بە فیلمە سۆزداری و کۆمیدییە سەرکەوتووەکانی ناسراوە، ئەرکی بەرهەمهێنانیشی لە ئەستۆ دەبێت.
هەوادارانی سینەما بە پەرۆشەوە چاوەڕێی ئەم گەڕانەوەیەی مایەرزن، چونکە هەمیشە کارەکانی تام و چێژێکی تایبەتیان هەیە و دەنگدانەوەی گەورە دروست دەکەن.