رۆژی چوارشەممە، لە بەشی كەلەپوور و هونەرە میللییەكان- هۆڵی رۆشنبیریی هەولێر، بەڕێوەبەرایەتی گشتی رۆشنبیری و هونەری هەولێر مەراسیمێكی رێزلێنانی بۆ هونەرمەندی میللی تەحسین سنجاوی رێك خست.
رێوڕەسمەکە بە ئامادەبوونی سیروان عوسمان، بەڕێوەبەری گشتی رۆشنبیری و هونەری هەولێر و سەلیم قادر، جێگری بەڕێوەبەری گشتی و هیمداد لەشكری، بەڕێوەبەری كەلەپوور و هونەرە میللییەكان و سەرمەند فواد، بەڕێوەبەری هونەرەكانی موزیك و ئازاد لەشکری، بەڕێوەبەری شێوەکاری و ژمارەیەك هونەرمەند بەڕێوەچوو.
لە رێوڕەسمەکەدا، وێڕای ستایشكردنی رۆڵی لە بواری هونەر و موزیك، سوپاس و پێزانینی ئاراستە كرا بەرامبەر بەو خزمەتەی چەندین ساڵە لە بوارەكەدا كردوویەتی.
هەر لە رێوڕەسمەکە هونەرمەند تەحسین سنجاوی بە ساز و بە گۆرانی و لەگەڵ هونەرمەند عەباس عاشق چەند گۆرانییەكی پێشكەش كرد و رێوڕەسمەکە بە پێشكەشكردنی قەڵغانی رێزلێنان بە هونەرمەند كۆتایی هات.