بڕیارە ڕۆژی سێشەممە، 21ـی نیسانی 2026، سەنتەری گەنجان پێشانگایەکی تایبەت بۆ هونەرمەندی شێوەکار گەیلان عەبدوڵڵا ئیسماعیل، لەژێر ناونیشانی “خەونەکانی گۆنا ” بکاتەوە.
پڕۆژە هونەرییەکە کار لەسەر گۆڕینی خەون بۆ وێنە و گواستنەوەی زمانەوانی بۆ بەرجەستەبوونی وێنەیی دەکات. هونەرمەند لە ڕێگەی ڕەنگ و فۆرمە جیاوازەکانەوە، هەوڵ دەدات لایەنە ئاڵۆزەکانی خەون و نەستی مرۆڤ نیشان بدات، بە شێوەیەک کە هەر تابلۆیەک پەیامێکی شاراوەی ناخی مرۆڤ یان وێنەیەکی منداڵی دەگێڕێتەوە.
رێوڕەسمی کردنەوەی پێشانگاکە لە کاتژمێر 4:00ـی ئێوارەی ڕۆژی سێشەممە 21ـی نیسانی 2026 لە گەلەری سەنتەری گەنجان کە دەکەوێتە سەر ڕێگەی بەحرکە و چەدن رۆژێک بەردەوام دەبێت و هاتن بۆ هەمووانە.
گەیلان عەبدوڵڵا ئیسماعیل، لەدایکبووی 1983یە لە هەولێر. خاوەنی بڕوانامەی ماستەرە لە هونەری هاوچەرخ و میدیای نوێ لە زانکۆی “سانت-دینیز” لە پاریس، ئێستاش قوتابی دکتۆرایە لە کۆلێژی هونەرە جوانەکانی زانکۆی سەلاحەدین.
یەکێکە لە هونەرمەندە چالاکەکان و لە 2008 خەڵاتی باشترین لاوی ساڵی پێبەخشراوە، کارەکانی نێوان شێوازە ئەکادیمییەکان و هونەری هاوچەرخ وەک فۆتۆگرافی، ڤیدیۆ ئارت و پێرفۆرمانس کۆدەکاتەوە.