لە چوارچێوەی هەوڵە بەردەوامەکان بۆ بەرزکردنەوەی ئاستی زانستی و باشترکردنی خزمەتگوزارییە تەندروستییەکان، ئەمڕۆ لە بەشی تیشک و سۆناری نەخۆشخانەی ڕزگاری فێرکاری، سیمینارێکی زانستی بە بەشداری ژمارەیەک لە پزیشکانی پسپۆڕ و کادیرانی بەشەکە بەڕێوەچوو.
لە سیمینارەکەدا، دوایین زانیاری و ئەزموونە جیهانییەکان لە بواری تیشک و سۆنار خرانە ڕوو، بە ئامانجی ئاشناکردنی کادیرانی تەندروستی بە نوێترین تەکنەلۆژیا و ڕێگاکانی دەستنیشانکردنی نەخۆشی.
خاڵی جەوهەریی سیمینارەکە ئامادەبوونی دکتۆرە (نورجیهان عەلی شەعبان)، بەڕێوەبەری نەخۆشخانەی ڕزگاری فێرکاری و دەستەی کارگێڕی نەخۆشخانەکە بوو. ئامادەبوونی بەڕێوەبەری نەخۆشخانە وەک ئاماژەیەک بۆ پشتگیری ڕاستەقینەی بەڕێوەبەرایەتییەکە هەژمار دەکرێت بۆ پرۆسەی فێرکاری بەردەوام و پەرەپێدانی توانای مرۆیی لە کەرتی تەندروستیدا.
دکتۆرە نورجیهان عەلی شەعبان، کە بە شێوەیەکی مەیدانی و بەردەوام سەرپەرشتی چالاکییە زانستییەکانی بەشە جیاوازەکانی نەخۆشخانەکە دەکات، جەختی لەوە کردەوە کە گەشەی زانستی و نوێبوونەوەی زانیارییەکان، بنەمای سەرەکین بۆ پێشکەشکردنی باشترین خزمەتگوزاری بە هاووڵاتیان.
نەخۆشخانەی ڕزگاری فێرکاری، وەک یەکێک لە ناوەندە تەندروستییە گرنگەکانی پایتەخت، هەمیشە هەوڵ دەدات لە ڕێگەی ڕەخساندنی ژینگەیەکی زانستی و نوێگەرییەوە، ئاستی خزمەتگوزارییە پزیشکییەکان لە هەرێمی کوردستان بەرەو قۆناغێکی پێشکەوتووتر ببات.
ڕاگەیاندنی نەخۆشخانەی ڕزگاری فێرکاری