سەرچاوەیەکی باڵای ئەمنی وردەکاریی ئەو رێککەوتنە ئەمنییەی ئاشکرا کرد کە لەنێوان عێراق و ئێران واژۆ کرا و بەرزکراوەتەوه بۆ یاداشتێکی لێکتێگەیشتنی ئەمنی.
سەرچاوەکه بە شەفەق نیوزی راگەیاند، “ئەو یاداشتە باس لە پرسی ئۆپۆزسیۆنی ئێرانی لە باکووری عێراق و رێگریکردن لە دووبارەکردنەوەی ئەزمونی پەکەکه لە ناوچەکە لەخۆدەگرێت”. ئاماژەی بەوەش کردووە، “ئامانجی رێککەوتنەکە بەرزکردنەوەی ئاستی هەماهەنگی ئەمنی و هەواڵگرییە بۆ کەمکردنەوەی ئەگەری هەر هەڕەشەیەک.”
ئاماژەی بەوەش کرد، “یاداشتەکە میکانیزمەکانی ئاڵوگۆڕی زانیاری هەواڵگری و رێکخستنی مەفرەزەی هاوبەش لەخۆدەگرێت، توانای هەردوو وڵات بۆ رووبەڕووبوونەوەی هەر چالاکییەکی چەکداری کە هەڕەشە لە ئاسایش و سەقامگیری ناوچە سنوورییەکان دەکات لەخۆدەگرێت.”
ئەمه له کاتێکدایه تەنیا دوای رۆژێک له رێککەوتنەکه وەزارەتی دەرەوەی ئەمریکا لێکتێگەیشتنه ئەمنییەکه رەتکردەوه و هەڕەشەی له جێبەجێکردنی رێککەوتنەکه کرد.