ڕۆژی سێشەممە، 16-6-2026، فەرماندەیی هێزەکانی “سەرایا سەلام” جیابوونەوەی تەواوەتی خۆیان لە ڕەوتی نیشتمانی شیعە ڕاگەیاند، و یەکگرتنی گشتگیری خۆیان لەگەڵ دامودەزگاکانی دەوڵەتی عێراقدا دووپاتکردەوە. هاوکات ئاماژەیان بەوەدا کە ئامادەبوونیان لە شاری سامەڕا بەردەوام دەبێت تا ئەو کاتەی دۆسیەی ئەمنی شارەکە بە فەرمی دەگوازرێتەوە بۆ هێزە ئەمنییەکانی حکومەت.
نوێنەری سەرایا سەلام لە میانی کۆنگرەیەکی ڕۆژنامەوانیدا ڕایگەیاند، موقتەدا سەدر، ڕێبەری ڕەوتی نیشتمانی شیعە، پێشوازی و دەستخۆشی لەم هەنگاوانە کردووە. نوێنەرەکە گوتی:
“ئەم بڕیارە بە مانای وازهێنان لە عەقیدە نایەت، بەڵکو نوێنەرایەتی هەڵوێستێکی بەرپرسیارانە دەکات بە ئامانجی سەقامگیرکردنی دەوڵەت، چەسپاندنی سەروەری یاسا، و پاراستنی ئاسایش و یەکگرتوویی عێراق.”
سەبارەت بە دۆخی شاری سامەڕا، سەرایا سەلام پابەندبوونی خۆی بە مانەوە لە شارەکە دەربڕی، وەک وەفایەک بۆ خوێنی شەهیدانیان کە بەرگرییان لە مەزارگە پیرۆزەکان کردووە. جەختیشیان کردەوە کە بەردەوام دەبن لە ئەرکی پاراستنی شارەکە و خزمەتکردنی هاووڵاتیان و زیارەتکاران تا کاتی ڕادەستکردنی فەرمی مەلەفی ئەمنی.
ئەم قسانە لە دوای ئەوە دێت کە دەستەی حەشدی شەعبی لە بڕیارێکدا، عەلی جاخیفە لەفتح ئەلشەمەری (کە بە نزیک لە سەرایا سەلام دادەنرێت) لە پۆستی فەرماندەی ئۆپەراسیۆنەکانی سامەڕا لادا و فەرماندەیەکی نوێی لە شوێنی دەستنیشانکرد.
ئەم گۆڕانکارییە گرژیی لە نێوان چەکدارانی سەرایا سەلامدا لێکەوتەوە، بەهۆی ئەوەی فەرماندە نوێیەکە سەر بە بزووتنەوەی “عەسائیب ئەهلی حەق”ە. پاشخانی ناکۆکی نێوان ئەم دوو لایەنە مێژووییە و دەگەڕێتەوە بۆ جیابوونەوەی قەیس خەزعەلی لە سوپای مەهدی، کە پێشتر چەندین جار بووەتە هۆی ململانێی سیاسی و چەکداری لە پارێزگاکانی باشوور، بەتایبەت لە بەسرە و میسان.