بریارە سبەی قۆناغی یەكەمی دابەشكردنی پارچە زەویی بەسەر فەرمانبەران لە ناحیەی دارەتوویی سەر بە قەزای بەردەڕەش دەست پێ بكات.
تەحسین عیسمەت، بەڕێوەبەری ناحیهی دارهتووی ڕایگەیاند: بەپێی بڕیاری مەسرور بارزانی، سەرۆکی حکوومەتی هەرێمی کوردستان، ئامادهكاریی تهواو كراوه كە سبەی پێنجشەممە 639 پارچهزەوی وەکوو قۆناغی یەکەم به شێوهی تیروپشك بەسەر فەرمانبەرانی ناحیەی دارەتوو دابەش دەکرێت.
گوتیشی: ئەوە یەکەم جارە زەوی لە ناحیەی دارەتوو دابەش بکرێت و دابەشكردنەكە بەپێی خاڵبەندییە و لە قۆناغی یەکەمدا لە خاڵی 48 تاکوو خاڵی 21 زەوییان بەردەکەوێت.
بەرێوەبەری ناحیەی دارەتوو دەشڵێت: بۆ قۆناغی دووەم چاوەڕێی تەواوبوونی رێکارە ئیداری و یاساییەکانین کە 550 فەرمانبەری دیکە دەگرێتەوە، ئەو زەوییانەی دابەشیش دەکرێن شوێنیان باش و گونجاوە.