ئەمڕۆ چوارشەممە، لە چوارچێوەی سەردانێکی فەرمیدا بۆ باکووری کوردستان، پارێزگارەکانی هەولێر و دهۆک لەگەڵ هاوسەرۆکانی شارەوانیی گەورەی ئامەد، بەنێو بازاڕی مێژوویی و نێوەندی شاری ئامەددا گەڕان و لە نزیکەوە لەگەڵ هاووڵاتییان و کاسبکارانی شارەکە کۆبوونەوە.
ئومێد خۆشناو، پارێزگاری هەولێر و د. عەلی تەتەر، پارێزگاری دهۆک، بە یاوەریی هەریەک لە ئایشە سێرا بوجاک و دۆغان هاتون، هاوسەرۆکانی شارەوانیی گەورەی ئامەد، گەشتێکی مەیدانییان بۆ نێو بازاڕی شارەکە ئەنجامدا.
لەو بەسەرکردنەوەیەدا، شاندەکەی هەرێمی کوردستان لەگەڵ ژمارەیەکی زۆر لە کاسبکاران و خەڵکی شارەکە گفتوگۆیان کرد و لە بارودۆخی بازاڕ و بژێوی ژیانیان کۆڵییەوە. هاووڵاتییانی ئامەد بە گەرمی پێشوازییان لە پارێزگارەکانی هەولێر و دهۆک کرد.
ئەم سەردانە و گەڕانە مەیدانییە لە چوارچێوەی هەوڵەکان بۆ بەهێزکردنی پەیوەندییە مێژوویی، کۆمەڵایەتی و کولتوورییەکانی نێوان شارەکانی هەرێمی کوردستان و باکووری کوردستان دێت، بەتایبەتی لە نێوان هەولێر، دهۆک و ئامەد، کە وەک سێ چەقە گرنگەکەی ناوچەکە دەبینرێن.
بڕیار وایە لە پەراوێزی ئەم سەردانەدا، چەندین کۆبوونەوەی دیکە بە مەبەستی پەرەپێدانی هەماهەنگییەکانی نێوان پارێزگاکان و شارەوانییەکان لە بوارە خزمەتگوزاری و کولتوورییەکاندا ئەنجام بدرێن.