رۆژی پێنجشەممە، ٥ـی ئایاری ٢٠٢٦، لە مەراسیمێکدا بە ئامادەبوونی بەرپرسانی باڵا و کونسوڵی گشتیی هۆڵەندا، یاداشتنامەیەکی لێکتێگەیشتن لە نێوان ناوەندی هاوبەشی هەماهەنگی قەیرانەکان (JCC) سەر بە وەزارەتی ناوخۆ و ڕێکخراوی VNGـی هۆڵەندی واژوو کرا، کە ئامانج لێی پەرەپێدانی تواناگۆڕینەوە و بەهێزکردنی ژێرخانی بەڕێوەبردنی کارەساتەکانە لە هەرێمی کوردستان.
لە مەراسیمەکەدا، کە هەر یەکە لە “سروە ڕەسول” بەڕێوبەری گشتی ناوەندی هاوبەشی هەماهەنگی قەیرانەکان، “ئادریان ئایسلستین” کونسوڵی گشتی شانشینی هۆڵەندا و “خاتوو ڕەوشەن” سەرۆکی ڕێکخراوی VNG ئامادەی بوون، جەخت لەسەر هەماهەنگییە ستراتیژییەکانی نێوان هەردوولا کرایەوە.
ئامانجی یاداشتنامەکە
ئەم ڕێککەوتنە لە چەند تەوەرەیەکی سەرەکیدا چڕ دەبێتەوە، لەوانە:
١. بەرزکردنەوەی ئاستی سیستەمی بەڕێوەبردنی قەیران و کارەسات لە هەرێمی کوردستان.
٢. پەرەپێدانی توانای کۆمەڵگە خۆجێییەکان بۆ خۆگونجاندن لەگەڵ بارودۆخە نائاساییەکان.
٣. کارکردن لەسەر پرسی ئاوارە و پەنابەران وەک یەکێک لە تەوەرە بنەڕەتییەکانی کارنامەی هاوبەشی هەردوولا.
لەلایەن خۆیەوە، سروە ڕەسول، بەڕێوبەری گشتی ناوەندی JCC، سوپاسی کونسوڵخانە و حکومەتی هۆڵەندای کرد بۆ پشتیوانییە بەردەوامەکانیان و ڕایگەیاند: “هیوادارین ئەم یاداشتنامەیە ببێتە وێستگەیەکی نوێ بۆ پتەوکردنی پەیوەندییەکان و سەرکەوتنی زیاتری پرۆژە هاوبەشەکانمان.”
هاوکات ئادریان ئایسلستین، کونسوڵی گشتیی هۆڵەندا، خۆشحاڵی خۆی بەم هەنگاوە دەربڕی و دووپاتی کردەوە کە وڵاتەکەی لەسەر پشتیوانییەکانی بۆ هەرێمی کوردستان بەردەوام دەبێت. هەر لە کۆبوونەوەکەدا، ئاسۆی کاری داهاتوو و چەندین بابەتی گرنگی پەیوەست بە هاوبەشیی نێوان هەردوولا تاوتوێ کران.
ئەم هەنگاوە لە کاتێکدایە، هەرێمی کوردستان بەهۆی بارودۆخی ناوچەکە و لێکەوتەکانی گۆڕانی کەشوهەوا، پێویستی بە سیستەمێکی پێشکەوتووی بەڕێوەبردنی قەیرانەکان هەیە و هۆڵەنداش یەکێکە لەو وڵاتانەی لەم بوارەدا هاوکارییەکی چالاکی هەرێم دەکات.