ئەو سێ گەنجە کوردەی لە یاریی نێوان مانچێستەر سیتی و گاڵاتەسەرای لە چامپیۆنزلیگ، چوونە ناو یاریگا و ئاڵای کوردستانیان بەرزکردەوە، بە سێ ساڵ بێبەشکردن سزادران.
بەڵێن عەلی، میران ناسیح و هەڵۆ کاوە کە هەرسێکیان لەدایکبووی دەربەندیخانن و لە بەریتانیا دەژین، رۆژی 28ی مانگی یەکی ئەمساڵ، لە یاریی نێوان هەردوو یانەدا، لە گەڕی کۆتایی قۆناخی یەکەمی چامپیۆنزلیگ، بەجلوبەرگی کوردییەوە چوونە ناو یاریگاوە و ئاڵای کوردستانیان بەرزکردەوە، بەرلەوەی لەلایەن هێزی ئاسایشپارێزی یاریگاکەوە دەستگیربکرێن و دواتر بەبڕیاری دادوەر ئازاد بکرێن.
ئەو سێ گەنجە، ئەمڕۆ لە شاری مانچێستەر بانگهێشتی بەردەم دادوەر کران و بە پێی یاسای ئاژاوەگێڕیی ئینگلتەرا سزادران.
سزای سێ گەنجەکە، بریتییە لە بێبەشکردنیان لە چوونە نێو یاریگاکانی ئەو وڵاتە بۆ ماوەی سێ ساڵ، ئەمە جیا لە پێبژاردنی ماڵی بەبڕی 1250 پاوەند بۆ هەر یەکێکیان کە لەو بڕە پارەیە 162 پاوەندی بۆ پارێزەران بوو، ئەوی دیکەش کە 1088 پاوەند دەکات، سزای دادگاکە بوو.