ئەڤرۆ دووشەمبی، ١٥ێ حوزەیرانا ٢٠٢٦ێ، ب ئامادەبوونا د. عەلی تەتەر، پارێزگارێ دهۆکێ و بەرپرسێن حزبی و حکومی، قۆناغا ئێکێ یا پڕۆژێ ستراتیژی یێ وەرگرێ ئاڤا خانکێ هاتە ڤەکرن، کو دێ کێشەیا کێمییا ئاڤێ ل دەڤەرێ چارەسەر کەت.
پڕۆژەکە ل سەر بودجەیا پارێزگەها دهۆکێ و ب سەرپەرشتیا ڕێڤەبەرییا ئاڤا دەوروبەرا هاتیە جێبەجێکرن. پڕۆژە ژ پرەکێ ب درێژاهیا ٢٦٠ مەتران و بلنداهیا ٤ مەتران پێکدهێت، دگەل ئەنتیکەیەکێ (وەرگرەکێ ئاڤێ) ب درێژاهیا ١٣.٥ مەتران و بلنداهیا ٢٤ مەتران.
ل دویف زانیاریێن تەکنیکی یێن پڕۆژەی، شیانێن بەرهەمئینانا ئاڤێ د دەمژمێرەکێدا دگەهیتە ٣٤٠٠ مەترێن سێجا، کو دێ ئاڤەکا پاقژ و ساخلەم بۆ هژمارەکا زۆرا ئاکنجیێن دەڤەرێ دابین کەت.
د. عەلی تەتەر، پارێزگارێ دهۆکێ د کۆنگرەکێ رۆژنامەڤانیدا ڕاگەهاند: “سۆپاسیا مەسرور بارزانی، سەرۆکێ حکومەتا هەرێما کوردستانێ دکەین کو سەرەڕای قەیرانێن دارایی و فشاران، بەردەوامە ل سەر پشتەڤانیکرنا پڕۆژێن خزمەتگۆزاری.”
پارێزگارێ دهۆکێ ئاشکرا ژی کر کو بتنێ ل دەڤەردارییا سێمێلێ ١٧٢ پڕۆژە هاتینە پلانکرن، ژ وان ١٢٨ پڕۆژە ب دووماهی هاتینە و کەفتینە د خزمەتا گشتیدا، هەروەسا کار ل سەر ٤٤ پڕۆژەیێن دی ژی بەردەوامە.
دەربارەی مفادارێن پڕۆژەی، د. عەلی تەتەر گۆت: “د قۆناغا ئێکێدا ئاڤ بۆ ناوچەدارییا خانکێ هاتیە دابینکرن، و د قۆناغا دوویێ یا پڕۆژەی دا دێ چەندین دەڤەرێن دی یێن دەوروبەر مفادار بن.”
ئەڤ پڕۆژەیە د چوارچۆڤێ وان هەولێن حکومەتێ دایە بۆ دابینکرنا پێدڤیێن سەرەکی یێن وەلاتیان و گەهاندنا خزمەتگۆزاریێن ستراتیژی بۆ هەمی دەڤەران بێی جوداهی.