دیوانی ئەمیری قەتەر، کە باڵاترین دەسەڵاتی حکومییە لەو وڵاتە، ڕۆژی یەکشەممە ڕایگەیاند شێخ حەمەد بن خەلیفە ئال سانی، ئەمیری پێشووی وڵات و ئەو کەسایەتییەی قەتەری لە وڵاتێکی سادەوە گۆڕی بۆ هێزێکی کاریگەری ناوچەیی، لە تەمەنی ٧٤ ساڵیدا کۆچی دوایی کرد.
شێخ حەمەد بن خەلیفە لە ساڵی ١٩٩٥ تاوەکو ٢٠١٣ فەرمانڕەوای قەتەر بوو، پێش ئەوەی بە شێوەیەکی ئارام دەسەڵات بۆ شێخ تەمیمی کوڕی (ئەمیری ئێستا) بەجێبهێڵێت.
دیوانی ئەمیری لە بەیاننامەیەکدا ڕایگەیاند: “دیوانی ئەمیری بە خەم و پەژارەیەکی قووڵەوە هەواڵی کۆچی دوایی حەزرەتی ‘ئەمیری باوک’ شێخ حەمەد بن خەلیفە ئال سانی ڕادەگەیەنێت کە بەیانی ئەمڕۆ یەکشەممە کۆچی دوایی کرد. داواکارین لە یەزدانی مەزن بە بەزەیی خۆی شادی بکات و پاداشتی ئەو خزمەتانەی بداتەوە کە پێشکەشی نیشتمان و نەتەوەکەی کردووە.”
شێخ حەمەد بە ئەندازیاری سەرەکی بەرزکردنەوەی پێگەی جیهانیی قەتەر دادەنرێت؛ لە دیارترین کارەکانی دامەزراندنی تۆڕی ڕاگەیاندنی “جەزیرە” و بەدەستهێنانی مافی میوانداریکردنی مۆندیالی ٢٠٢٢ بوو.
قەتەر، کە وڵاتێکی هاوپەیمانی ئەمریکایە و ژمارەی دانیشتووانی نزیکەی ٢.٥ ملیۆن کەسە، لە سەردەمی ئەودا بووە گەورەترین هەناردەکاری غازی سروشتی (LNG) لە جیهاندا و بووە هێزێکی وەبەرهێنانی جیهانی و یاریزانێکی سەرەکی لە دیپلۆماسیەتی ڕۆژهەڵاتی ناوەڕاست و میدیای نێودەوڵەتیدا.
شێخ حەمەد لە ساڵی ٢٠١٣دا، لە هەنگاوێکی دەگمەندا بۆ ناوچەی کەنداو، دەسەڵاتی ڕادەستی شێخ تەمیمی کوڕی کرد بۆ ئەوەی گواستنەوەیەکی ئارام و بێ کێشە بۆ دەسەڵات مسۆگەر بکات. شایانی باسە شێخ حەمەد خۆی لە ساڵی ١٩٩٥ و لە ڕێگەی کودەتایەکی سپییەوە (بێ خوێنڕشتن) دەسەڵاتی لە باوکی گرتبووە دەست.
ڕۆیتەرز