شەپۆلێکی بەهێزی بارانی بەخوڕ و لافاو زۆربەی شارەکانی تورکیای گرتەوە؛ جگە لە ژێرئاوکەوتنی دەیان ئۆتۆمبێل و گیرخوردنی هاووڵاتییان، زیانێکی زۆری دارایی بەر ژێرخانی شارەکان، ماڵان و بازاڕەکان کەوتووە.
لە شارە گەورەکانی وەک ئەنقەرە و ئیستانبوڵ، بەهۆی بەرزبوونەوەی خێرای ئاستی ئاو لە ناو ژێرپردەکان و شەقامە گشتییەکاندا، دەیان ئۆتۆمبێل نوقم بوون و شۆفێران لە ناو ئاودا گیرپۆڕ بوون. هەروەها بەرزیی ڕێژەی ئاوەکە بووەتە هۆی داڕمانی چەندین ڕێگەی سەرەکی و دروستبوونی چاڵی گەورە لە ناو شەقامەکاندا.
زیانەکان تەنیا لە شەقامەکاندا قەتیس نەکراونەتەوە؛ لە شارەکانی عوسمانییە و ئەدەنە ئاو چووەتە ناو ماڵان و بنکە تەندروستی و نەخۆشخانەکانەوە. هاوكات لە شارەکانی تۆکات، یۆزگات و ئەماسییە، بارانبارینی بەخوڕ لە کەمتر لە کاتژمێرێکدا بازاڕەکان و قاتی خوارەوەی باڵەخانەکانی داپۆشیوە و زیانێکی زۆری بە کاسبکاران و فرۆشیاران گەیاندووە.
لەلایەکی دیکەوە، سەرۆکایەتی بەڕێوەبردنی کارەسات و باری لەناکاو (AFAD) کە پێشتر ئاگاداریی بۆ ۳٥ شار دەرکردبوو، زیاتر لە ۱۸ هەزار کارمەند و هەزاران ئۆتۆمبێلی فریاگوزاری ڕەوانەی ناوچە زیانپێکەوتووەکان کردووە بە مەبەستی ڕزگارکردنی ئەو کەسانەی لە ماڵ یان ئۆتۆمبێلەکانیاندا گیرییان خواردووە.
مەترسییەکانی لافاو لە تورکیا بابەتی نوێ نین؛ وڵاتەکە بەردەوام رووبەڕووی شەپۆلی بارانی لەناكاوی بەخوڕ و لافاوی وێرانکەر دەبێتەوە، بەتایبەتی لە ناوچەکانی دەریای ڕەش و ناوەڕاستی ئەنادۆڵ کە بە دەست ناپۆشتەیی ژێرخان و گۆڕانکارییەکانی کەشوهەواوە دەناڵێنن.