بەپێی نوێترین ئامارە فەرمییەکانی حکومەتی کۆماری دیموکراتی کۆنگۆ، ژمارەی تووشبووانی ڤایرۆسی ئیبۆلا لە وڵاتەکەدا بە شێوەیەکی بەرچاو زیادی کردووە و گەیشتووەتە ٣,٢٠٠ حاڵەتی پشتڕاستکراوە، کە لەو ژمارەیە تا ئێستا ١,٤٠٥ کەس گیانیان لەدەستداوە.
ئەم شەپۆلە نوێیەی نەخۆشییەکە کە لە جۆری (بوندیبوگیۆ – Bundibugyo)یە، بە شێوەیەکی فراوان لە پارێزگای “ئیتوری” لە ڕۆژهەڵاتی وڵاتەکە بڵاوبووەتەوە. وێنە و ڕاپۆرتە مەیدانییەکان نیشانی دەدەن کە تیمە تەندروستییەکان لە نەخۆشخانەی گشتیی “ڕوامپارا” لە دەرەوەی شاری بونیا، لەوپەری ئامادەباشیدان بۆ وەرگرتنی نەخۆش و ڕێگریکردن لە تەشەنەسەندنی زیاتری ڤایرۆسەکە.
لە لایەکی دیکەوە، هاوپەیمانییەکی نێودەوڵەتی هۆشداری دەدات کە ئەم ئامارانەی ڕاگەیەندراون تەنیا “سەری شاخە سەهۆڵینەکەن” و دەکرێت ژمارەی ڕاستەقینەی تووشبووان و قوربانییان زۆر لەوە زیاتر بێت کە تۆمار کراوە، بەهۆی ئەوەی لە زۆرێک لە ناوچە دوورەدەستەکاندا دەستڕاگەیشتن بە خزمەتگوزارییە تەندروستییەکان سنووردارە.
حکومەتی کۆنگۆ و ڕێکخراوە تەندروستییە نێودەوڵەتییەکان هەوڵەکانیان چڕکردووەتەوە بۆ کۆنترۆڵکردنی ئەم شەپۆلە نوێیە، لە کاتێکدا مەترسییەکان لەسەر ناوچەکە بەردەوامە.
سەرچاوە: ڕۆیتەرز