بەبۆنەی تێپەڕبوونی ١٣ ساڵ بەسەر دەستپێکی کارەکانیدا، بەشی ڕۆشنبیری و ڕاگەیاندنی پارتی دیموکراتی کوردستان پەیامێکی پیرۆزبایی ئاراستەی بەڕێوەبەر و ستاف و کارمەندانی ڕادیۆی کازیوە کرد.
لە پەیامەکەدا هاتووە: “لە (١٣)یەمین ساڵیادی دامەزراندنی (ڕادیۆی کازیوە)دا، پیرۆزباییەکی گەرم لە ئێوەی هێژا و بیسەرانی ئازیزی ڕادیۆکەتان دەکەین؛ هیوادارین بۆ لەمەودواش هەنگاوی نوێتر بەرەو پێش بنێن و زیاتر خزمەتی بواری ڕاگەیاندن بکەن لەو دەڤەرەدا.”
بەشی ڕۆشنبیری و ڕاگەیاندنی پارتی ئاماژەی بە ڕۆڵی گرنگی ئەم میدیایە کردووە و ڕایگەیاندووە: “ڕادیۆی کازیوە شانبەشانی کەناڵەکانی دیکەی پارتیمان، ڕۆڵی دیار و بەرچاوی هەبووە لە خستنەڕووی خواست و ویستی هاووڵاتییان و پرسە نەتەوەیی و نیشتمانییەکاندا.”
لە کۆتایی پەیامەکەدا، جارێکی دیکە وێڕای پیرۆزبایی، هیوای بەردەوامی و سەرکەوتنی زیاتریان بۆ خواستوون لە ئەرکە میدیاییەکەیاندا.