وەزارەتی کارەبای حکومەتی هەرێمی کوردستان، نوێترین داتای پسوولەکانی مانگی تەممووزی (مانگی 7) لە چوارچێوەی پڕۆژەی ڕووناکی ڕاگەیاند. بەپێی ئامارەکان، تێچووی کارەبا بۆ زۆرینەی هاووڵاتییان کەمتر بووە لەو بڕەی پێشتر بۆ کارەبای نیشتمانی و مۆلیدە خەرجیان کردووە.
ئامارەکان بەپێی پارێزگاکان
وەزارەتی کارەبا ئاشکرای کردووە کە نیوەی ماڵان لە پڕۆژەی ڕووناکیدا، لە مانگی تەممووزدا کەمتر لە (29,000) دیناریان بۆ گەڕاوەتەوە، کە تێکڕای بەکارهێنانیان 406 کیلۆوات کاتژمێر بووە. وردەکارییەکە بەپێی پارێزگاکان بەم شێوەیەیە:
چارەسەرکردنی کێشە تەکنیکییەکان
وەزارەتی کارەبا ئاماژەی بەوە کردووە کە لەم خولەدا (کە ماوەکەی 33 ڕۆژ بووە)، کێشەی “پسوولەی سفر” بۆ ئەو هاوبەشانەی گرفتیان هەبوو چارەسەر کراوە، ئەمەش وەک بەشێک لە هەوڵەکانی حکومەت بۆ ڕێکخستنەوەی پرۆسەی پسوولەکردن.
داشکاندنی 50٪ بۆ قەرزە کۆنەکان
حکومەتی هەرێمی کوردستان وەبیرهێنانەوە بۆ هاووڵاتییان دەکاتەوە کە داشکاندنێکی ناوازە بە ڕێژەی 50٪ لەسەر قەرزی کۆنی پێش پڕۆژەی ڕووناکی بەردەوامە. ئەم هەلە تەنها تا ڕێکەوتی 10ی ئەیلوولی 2026 کارایە و دواتر کۆتایی دێت، مەبەست لێی هاوکاری هاوڵاتییانە بۆ پاکتاوکردنی قەرزەکانیان.
کارەبای 24 کاتژمێری بۆ 90٪ی هاووڵاتییان
بەپێی ڕاگەیەندراوەکە، تاوەکو ئەمڕۆ زیاتر لە 90٪ی هاووڵاتییانی کوردستان لە ڕێگەی پڕۆژەی ڕووناکییەوە کارەبای 24 کاتژمێرییان بۆ دابین کراوە. ئاماری حکومەت دەریدەخات کە 80٪ی هاووڵاتییان، بەتایبەت کەمدەرامەتان، ئێستا پارەیەکی کەمتر دەدەن بەراورد بەو بڕە پارەیەی پێشتر بۆ مۆلیدە و کارەبای نیشتمانی خەرجیان دەکرد.
دەربارەی پڕۆژەی ڕووناکی
پڕۆژەی ڕووناکی لە تشرینی دووەمی 2024 لەلایەن مەسرور بارزانی، سەرۆکوەزیرانی هەرێمی کوردستان ڕاگەیەندرا. ئامانجی پڕۆژەکە دابینکردنی کارەبای 24 کاتژمێرییە بۆ سەرانسەری هەرێمی کوردستان. حکومەت پلانی داناوە تاوەکو کۆتایی ساڵی 2026، تەواوی ماڵان و شوێنە بازرگانییەکانی کوردستان ببنە خاوەنی کارەبای بەردەوام.