سەرۆک وەزیرانی عێراق بە سەردانێکی فەرمی گەیشتە شانشینی بەحرەین و بڕیارە لەگەڵ پاشای ئەو وڵاتە کۆببێتەوە.
حەیدەر عەبوودی گوتەبێژی حکومەتی عێراق رایگەیاند، ئەم سەردانەی سەرۆک وەزیرانی عێراق بۆ بەحرەین لە چوارچێوەی ئەو سیاسەتی هاوسەنگییەدا دێت کە حکومەتی عێراق پەیڕەوی دەکات بۆ پتەوکردنی پەیوەندییە عەرەبییەکان و هاریکاریکردن لەگەڵ وڵاتانی ناوچەکە، لەپێناو پاراستنی بەرژەوەندییەکانی عێراق و سەقامگیریی ناوچەکەدا.
بڕیارە لە میانی سەردانەکەیدا بۆ مەنامەی پایتەخت، سەرۆک وەزیرانی عێراق لەگەڵ حەمەد بن عیسا ئال خەلیفە، پاشای بەحرەین کۆببێتەوە. تەوەری سەرەکیی گفتوگۆکانی نێوانیان تایبەت دەبێت بە پەرەپێدانی هاریکارییە سیاسی و ئابوورییەکانی نێوان هەردوو وڵات. هاوکات تاوتوێی دوایین پێشهاتەکانی ناوچەکە دەکرێت، لەگەڵ تاوتوێکردنی ڕێگاکانی هێورکردنەوەی گرژییەکان و پشتیوانیکردن لە چارەسەرە سیاسییەکان.
عەبوودی ئاماژەی بەوەش کردووە، ئەم سەردانەی بەحرەین وەک تەواوکاریی ئەو زنجیرە سەردانانە دێت کە پێشتر بۆ وڵاتانی ناوچەکەی کردبوو.