دوای بڵاوبوونەوەی ڕاپۆرتی دیوانی چاودێریی داراییی ئێران سەبارەت بە هەڵەی گەورەی حکوومەت لە خەرجکردنی پشتیوانیی حکوومی بۆ نان و خەرجنەکردنی ١١٦ هەزار ملیار تومەن پارەی گەنمی جووتیاران کە دەکاتەی نزیکەی یەک ملیار و ٩٠٠ ملیۆن دۆلار، ڕاوێژکاری وەزیری داراییی ئەم وڵاتە دەڵێت، پێویستە نرخی نان گران بکرێت.
محەمەد جەلال، ڕاوێژکاری وەزیری دارایی کە گوتەبێژی پرۆژەی ئامانجدارکردنی پشتیوانیی حکوومی بۆ ئارد و نان لە کابینەی ئیبراهیم ڕەئیسی بوو، بە ئاژانسی هەواڵی ئیلنای ڕاگەیاندووە، تێچووی نانەواخانەکان زیاد بووە و دەبێ پێداچوونەوە بە نرخی ناندا بکرێت.
جەلال دەڵێت، کابینەی ڕەئیسی لە سێ ساڵی ڕابردوودا نرخی پشتیوانیکراوی ئارد و نانی پاراستووە و ڕێگەی نەداوە نان گران بێت، بەڵام لەم ماوەیەدا تێچووی کڕێی شوێن و هەقدەستی کرێکارانی نانەواخانان گران بووە و کەلکەلەی نانەواخانەکان بۆ زیادکردنی نرخی نان لە جێی خۆیدایە.
دیوانی چاودێریی داراییی ئێرانیش دەڵێت، وەزارەتی دارایی زیاتر لە ٩٥ هەزار ملیار تومەن، واتا زیاتر لە یەک ملیار و ٥٥٠ ملیۆن دۆلاری لەو پارانەی بە ئەمانەت لە بەردەستیدا بوون، هەروەها لە سەرجەم بودجەی گشتی بەشێوەی قەرز بۆ دابینکردنی کاڵا و کڕینی گەنم خەرج کردووە. بۆ ئەوەش لە ساڵی ٢٠٢٣ بۆ کڕینی گەنم ٣٥.٥ هەزار ملیۆن تمەن، لە ساڵی ٢٠٢٤ بۆ دانەوەی قەزری گەنمی جووتیاران ٤٢ هەزار ملیار تمەن و ١٨.٨ هەزار ملیار تمەنێشی هەر ئەمساڵ بۆ ئەو مەبەستە خەرج کردووە.
بەپێی ڕاپۆرتەکەی چاودێریی دارایی، حکوومەت بەبێ لەبەرچاوگرتنی یاسا و ڕێنوێنییەکان بڕی ٣١.٥ هەزار ملیار تمەنی لە پارەی تەرخانکراو بۆ گەنمی جووتیاران هەڵگرتووە و کردوویەتە ناو هەژماری پشتیوانییە حکوومییەکانەوە.
لە لایەکی دیکەشەوە عەلیقولی ئیمانی، کارگێڕی دامەزراوەی نیشتمانیی گەنمی ئێران دەڵێت، جووتیاران ئەمساڵ زیاتر لە ٩ ملیۆن تۆن گەنمیان بە حکوومەت داوە، بەڵام حکوومەت تا ئێستا ١١٦ هەزار ملیار تمەن، نزیکەی یەک ملیار و ٩٠٠ ملیۆن دۆلار پارەی گەنمی جووتیارانی بەلاوە ماوە.
ڕێکخراوی خۆراک و کشتوکاڵی نەتەوە یەکگرتووەکانیش ڕایگەیاندووە، ئەمساڵ بەرهەمهێنانی گەنمی ئێران زیاد ناکات، بەڵام هاوردەکردنی گەنم لەم وڵاتە دەگاتە ٣ ملیۆن تۆن و بەراورد بە ساڵی ڕابردوو ٣٠٪ زیاد دەکات.
