وەزارەتی گەنجینەی ئەمریکا لە دووەمین ساڵوەگەڕی خۆپێشاندانەکانی خەڵکی ئێران بەهۆی گیانسپاردنی ژینا ئەمینی لە گرتنگەی پۆلیسی ئەخلاقی تاراندا ١٢ بەرپرسی دیکەی حکوومەتی ئێرانی خستە لیستی سزاکانی خۆیەوە.
بەپێی ڕاپۆرتێکی پێگەی وەزارەتی گەنجینەی ئەمریکا، ئەندامانی سوپای پاسداران، بەرپرسانی زیندان و ئەو کەسانەی دەستیان لە ڕفاندنی ئێرانیانی دەرەوەی وڵاتدا هەبووە، خراونەتە لیستی سزاکانەوە.
ڕاپۆرتەکە ئاماژەی بەوەش داوە، ئەو کەسانە بەرپرسن لە پێشێلکردنی مافی مرۆڤ، توندوتیژی لەگەڵ زیندانیانی ناڕازی، ئەشکەنجە و دەستدرێژیی سێکسی بۆ سەر زیندانیان، بێبەشکردنی زیندانیان لە چاودێریی پزیشکی و ڕفاندنی ئەو کەسانەی لە دەرەوەی وڵات ڕەخنە لە حکوومەت دەگرن.
مەتیو میللەر، گوتەبێژی وەزارەتی دەرەوەی ئەمریکاش ڕایگەیاندووە، کابینەی جۆ بایدن لە ماوەی کاری خۆیدا ٥٠٠ دامەزراوە و کەسایەتیی ئێرانیی خستووەتە لیستی سزاکانی خۆیەوە.
