لە یارییەکانی هەفتەی هەشتەمی خولی ئەڵمانیا، بایرن میونشن لە دەرەوەی یاریگای خۆی بووە میوانی بۆخۆم.
لە ئەنجامدا بایرن میونشنی زامدار گۆڵبارانی بۆخۆمی خاوەن یاریگای کرد و بە پێنج گۆڵی بێبەرامبەر لێی بردەوە.
هەر لە تایمی یەکەمدا، یانەی بایرن میونشن باشتر بینرا و بەتەواوی کۆنترۆڵی یارییەکەیان کرد، هەروەها لەو تایمەدا توانی دوو گۆڵ لە خولەکەکانی 16 و 26 لەلایەن ئۆلیسی و جەمال موسیالاوە تۆمارکرد و ئەو تایمەش بەو شێوەیە کۆتاییهات.
لە تایمی دووەم، یانە باڤارییەکە بەهەمان ئاست و هێز گەڕانەوە نێو یاریگا، هێرشەکانیان چڕکردەوە و توانیان سێ گۆڵی تر لە خولەکەکانی 57، 65 و 71 لەڕێگای هاری کەین، سانێ و کومانەوە تۆماربکەن و یارییەکە بەو شێوەیە کۆتاییهات.
بەم بردنەوەیە، بایرن میونشن بە 20 خاڵ لە پلەی یەکەمی ڕیزبەندی خولەکە دێت، بە جیاوازی گۆڵ لەگەڵ لایپزیگی دووەم.