ئێوارەی ئەمڕۆ دووشەممە 2024/11/4 لە هەولێر، شاندێکی سەرۆکایەتیی هەرێمی کوردستان کە پێکهاتبوو لە د. نووری عوسمان، سەرۆکی نووسینگەی سەرۆکی هەرێمی کوردستان و ژمارەیەک لە بەرپرس و ڕاوێژکارانی سەرۆکایەتی، بەشداریی لە ڕێوڕەسمی ڕۆژی نیشتمانیی ئەمەریکادا کرد کە لەلایەن کونسوڵخانەی گشتیی ئەمەریکاوە لە هەرێمی کوردستان، ڕێکخرا بوو.
لە ڕێوڕەسمەکەدا کە ژمارەیەک کەسایەتیی سیاسی و ئیداری، دیپلۆمات و نوێنەرایەتیی وڵاتان تیایدا بەشدار بوون، بەڕێز سەرۆکی نووسینگەی سەرۆک، پیرۆزباییی یادەکەی لە خاتوو ئێلينا ڕۆمانۆوسكى، باڵیۆزی ئەمەریکا لە عێراق و بەڕێز ستێڤ بيتنهر، کونسوڵی گشتی و ستافی کونسوڵخانەی ئەمەریکا لە هەرێمی کوردستان کرد و هیوای سەرکەوتنی لە ئەرک و کارەکانیاندا، بۆ خواستن.
لای خۆیانەوە بەڕێزان باڵیۆز و کونسوڵی گشتی، وێڕای دەربڕینی سوپاس و خۆشحاڵییان بە بەشداری شاندی سەرۆکایەتی لە ڕێوڕەسمەکەدا، جەختیان لە گرنگیی بەردەوامیی پەیوەندی و دۆستایەتیی نێوان هەرێمی کوردستان و ئەمەریکا، کردەوە.
