پارێزگای هەولێر لە ڕاگەیاندراوێكدا ئاماژە بەوە دەدات، كاری نۆژەنكردنەوەی 105 دووكانی بازاڕی قەیسەریی هەولێر كۆتایی هات و نۆژەنكردنەوەی دووكانەكانی دیكە و بازاڕەكەش بە گشتی، لە قۆناغی كۆتاییدایە.
ئەمڕۆ دووشەممە 6/1/2025، پارێزگای هەولێر ڕاگەیاندراوێكی بڵاو كردەوە و تێیدا هاتووە: “دواى ئەوەى شەوی 5/5/2024، ئاگرێکی گەورە لە بازاڕی قەیسەریی هەولێر کەوتەوە، بەهۆیەوە 227 دووکان و حەوت کۆگا سووتان، لەسەر بڕیار و ڕاسپاردەی مەسرور بارزانى، سەرۆکى حکوومەتى هەرێمى کوردستان، بە گوژمەی 5 ملیار و 300 ملیۆن دینار لەسەر بودجەی پارێزگای هەولێر، دەست بە نۆژەنکردنەوەی بازاڕەكە کرا.”
ئەويش خراوەتە ڕوو، ئێستا 105 دووکان لە بازاڕی قەیسەری هەولێر کارى نۆژەنکردنەوەیان كۆتایی هاتووە و خاوەنەکانیان دەگەڕێنەوە ناو دووکانەکانیان، کارکردن لە نۆژەنکردنەوەى دووکانەکانى دیكە و بازاڕەکەش لە قۆناغی کۆتاییدایە، لە نزیکترین کاتدا بازاڕەکە بە تەواوەتى بە ڕووی خەڵكیدا دەکرێتەوە، دووکاندار و کاسبکارانیش دەست بە کار و كاسبیی خۆیان دەکەنەوە.
شەوی 5/5/2024، ئاگر لە بەشێک لە بازاڕی قەیسەریی هەولێر کەوتەوە، دەستبەجێ تیمەکانی بەرگریی شارستانی و فریاگوزاریی هەولێر گەیشتنە شوێنی ڕووداوەکە و لەبەر فراوانیی قەبارەی ئاگرەکە و سەختیی گەیاندنی هۆیەکانی کوژاندنەوەی ئاگر، دوای چەند کاتژمێرێک ئاگرەکە کۆنترۆڵ کرا.
دوای ڕووداوەکە، ئومێد خۆشناو، پارێزگای هەولێر لە ڕاگەیەندراوێکدا لە بارەی ئاگرکەوتنەوەی بازاڕی قەیسەری، ئاشکرای کرد: “لە کۆی زیاتر لە چوار هەزار دوکان، 227 دوکان و حەوت کۆگای بچووکی بازاڕی قەیسەری، بەهۆی ئاگرکەوتنەوەکە سووتاون و زیانیان پێگەیشتووە.”
هەروەها ڕوونی کردەوە: “جگە لە زیانی دارایی ڕووداوەکە، هیچ زیانێکی گیانی لێ نەکەوتووەتەوە، بەڵام بەداخەوە بەهۆى قەرەباڵغیی هاوڵاتییان لە شوێنى ڕووداوەکە، 132 کەس لە ئەفسەر و کارمەندانی بەرگریی شارستانی، ئاسایش، پۆلیس، کاسبکار و هاووڵاتی، بریندار بوون و بەشێکیشیان بەهۆی دووکەڵی ئاگرەکەوە دۆخی تەندروستییان تێک چوو.”