ئەسکەندەر موئمنی، وەزیری نێوخۆی ئێران، ڕۆژی شەممە ١ی شوبات، لە چاوپێکەوتنێکی تایبەتی هەواڵیدا، ئاماری هاووڵاتیانی بیانی دانیشتووی ئێرانی خستەڕوو و گوتی “وڵات چی‌دیکە توانای وەرگرتنی هاوڵاتیانی بیانیی نییە.”
موئمنی گوتی: “بەپێی خەمڵاندنەکان، لانیکەم ٦ ملیۆن هاوڵاتیی بیانی لە ئێراندا هەن ولانیکەم دوو ملیۆنیان نایاسایین. دەرکردنی هاوڵاتیانی نایاسایی لە بەرنامەی کارمان دایە.”
وەزیری نێوخۆی ئێران هەروەها باسی لە “لەدەستدانی هەلی کار بۆ هاوڵاتیانی ئێرانی بەهۆی بوونی هاوڵاتیانی بیانی” کرد.
موئمنی گوتی: “لە سەرەتای ساڵەوە هەتا ئێستا نزیکەی یەک ملیۆن و سەد هەزار هاووڵاتی بیانی لە سنوورەوە بۆ وڵاتانی خۆیان گەڕێنراونەتەوە. خەمڵاندنەکان پیشان دەدەن ٥٠٪ لەو کەسانە دووبارە دەگەڕێنەوە.”