ئەمڕۆ یەکشەممە، 20-4- 2025، بەڕێوەبەرایەتی گشتی ماددە هۆشبەرەکان و کارتێکە عەقلییەکان، ئاماری تایبەت بە دەستبەسەردا گرتنی ماددە هۆشبەرەکان و دەستگیرکردنی تۆمەتبارانی چارەگی سێ مانگی یەکەمی ئەم ساڵی بڵاوکردەوە.
بەڕێوەبەرایەتی گشتی ماددە هۆشبەرەکانی سەر بە وەزارەتی ناوخۆی عێراق لە ڕاگەیەندراوێکدا ئاشکرای کرد، “لە چارەگی یەکەمی ئەمساڵ، سێ هەزار و 6 تۆمەتبار دەستگیرکراون و 973یان سزادراون، هەروەها دەست بەسەر 2 تۆن و 166 کیلۆگرام ماددەی هۆشبەری جۆراوجۆردا گیراوە.”
ئاماژەی بەوەش کرد، بەشی لێکۆڵینەوەی تایبەت لە بەڕێوەبەرایەتی گشتی لەم ماوەیەدا ڕۆڵێکی دیار و بەرچاوی هەبووە لە بەرەنگاربوونەوە و نەهێشتنی ماددە هۆشبەرەکان، هەروەها دادوەری دادگای لێکۆڵینەوەی ناوەندی ڕەسافە، کە تایبەتە بۆ دۆسیە تایبەتەکانی کاروباری ماددە هۆشبەرەکان، لەو ماوەیەدا دەستی بەسەر یەک تۆن و 538 کیلۆگرام ماددەی جۆراوجۆری هۆشبەردا گرتووە.
بەڕێوەبەرایەتییەکە ئاماژەی بەوەش داوە، تاوەکوو ئێستا لە ڕووبەرووبونەوەکان، دوو لە تۆمەتباران کوژراون و 13ـی دیکەش بریندار بوون.