لەگەڵ پەرەسەندنی گرژییەکانی ڕۆژهەڵاتی ناوەڕاست، چین داوای لە هاووڵاتییانی خۆی لە ئێران و ئیسرائیل کرد بە زووترین کات و لە ڕێگەی دەروازە وشکانییەکانەوە خاکی ئەو دوو وڵاتە جێبهێڵن.
باڵیۆزخانەی چین لە ئیسرائیل، ڕۆژی سێشەممە لە ڕاگەیەندراوێکدا هۆشداریی دا لە خراپتربوونی دۆخی ئەمنی و داوای لە هاووڵاتییانی چینی کرد لە زووترین کاتدا ئیسرائیل بەجێبهێڵن. باڵیۆزخانەکە ڕایگەیاند کە ئاسمانی ئیسرائیل هێشتا داخراوە و حکوومەتی ئەو وڵاتەش دۆخی نائاساییی تا کۆتایی ئەم مانگە درێژ کردووەتەوە.
هاوکات، باڵیۆزخانەی چین لە ئێرانیش لە ئاگادارییەکی هاوشێوەدا ئاماژەی بەوە کردووە کە ئاسمانی ئێران هێشتا بە داخراوی ماوەتەوە و مەترسیی داخرانی دەروازە سنوورییە وشکانییەکانیش لە ئاییندەیەکی نزیکدا هەیە.
شایەنی گوتنە، ئیسرائیل دوای شەڕی غەززە و قەدەغەکردنی هاتنی کرێکارانی فەلەستینی بۆ ناو خاکی خۆی، لە ماوەی ٢٠ مانگی ڕابردوودا و بەپێی ڕێککەوتنی فەرمی لەگەڵ چەند وڵاتێکی ئاسیایی، نزیکەی ١٠٠ هەزار کرێکاری لە چین، هیندستان و چەند وڵاتێکی دیکەی ڕۆژهەڵاتی ئاسیا بۆ کارکردن لە کەرتی کشتوکاڵ و بیناسازیدا هێناوەتە وڵاتەکەی.