تزاخی هانگبی، ڕاوێژکاری ئاسایشی نیشتمانیی ئیسرائیل، ڕۆژی سێشەممە پشتڕاستی کردەوە کە پەیوەندیی ڕاستەوخۆی ڕۆژانە لە نێوان ئیسرائیل و ڕژێمی سووریادا لە ئاستە جیاوازەکاندا لە ئارادایە و هەردوو لا سەبارەت بە ئەگەری ئاساییکردنەوەی پەیوەندییەکانیان گفتوگۆ دەکەن.
بەپێی هەواڵێکی ماڵپەڕی “ئیسرائیل هیوم”، هانگبی لە دانیشتنێکی نهێنیی لیژنەی پەیوەندییەکانی دەرەوە و بەرگریی کنێستدا لە ڕۆژی یەکشەممە گوتبووی: «لە نێوان ئیسرائیل و سووریادا لە هەموو ئاستەکاندا گفتوگۆی ڕاستەوخۆی ڕۆژانە هەیە. من خۆم سەرپەرشتیی ئەم دانوستانانە لەگەڵ بەرپرسە سیاسییەکانی سووریا دەکەم.» ناوبراو هەروەها ئاماژەی بەوەش کرد، سووریا و لوبنان وەک بەربژێری چوونە نێو ڕێککەوتنەکانی ئاساییکردنەوە، ناسراو بە “پەیمانی ئیبراهیم”، سەیر دەکرێن.
لە وەڵامی پرسیارێکدا سەبارەت بە ئەگەری کشانەوەی سوپای ئیسرائیل لە ناوچە دابڕێنەرەکانی سووریا، هانگبی گوتی: «ئەگەر پێوەندی ئاسایی ببێتەوە، ئەم پرسە تاوتوێ دەکەین.» بەڵام جەختی کردەوە: «لە بەرزاییەکانی جەبەل شێخ (حەرمۆنی سووریا) ناکشێینەوە.»
لێدوانەکانی هانگبی پشتڕاستکەرەوەی ئەو ڕاپۆرتە بیانییە دواییانەن سەبارەت بە گفتوگۆی ڕاستەوخۆی نێوان تەلئەبیب و دیمەشق؛ گفتوگۆکان بە ئامانجی کەمکردنەوەی گرژییەکان لەسەر سنوور و ڕێگریکردن لە پێکدادان لەگەڵ ئەحمەد شەرع، سەرکردەی نوێی سووریا، ئەنجام دەدرێن. بە گوتەی هانگبی، ئەم پەیوەندییە تەنیا سنووردار نییە بە کەناڵە سەربازییەکان، بەڵکوو پەیوەندیی دیپلۆماسیی ڕاستەوخۆش لەخۆ دەگرێت.